股市跌到失魂落魄，令好多人唔快樂，甚至覺得淒涼。在馬會飲茶，碰到鄭大班，立即畀佢捉住聽鬧一輪先，唔係鬧左丁山，而係鬧一啲股評人，分析師，點解成日唱好，不知大禍之將至。唔係話自己醒，只係要向佢解釋，世上分析師多數唱好，因為唱淡不受歡迎吖嘛，本欄喺七月二十四日講「寫股只可唱好」就引述分析Ｔ，佢唱淡，報紙唔高興，專欄停寫，故此多數人報喜不報憂也！左丁山呢幾個月來就不時唱淡，好彩《蘋果》有量度啫。
中午飲完茶，晚上到「銀袋」食鰻魚飯，又碰到老友Ｔ，一個人坐響度，猛睇住部黑莓，收發電郵。問佢點解一個人在此，老友Ｔ答得妙，話個市跌到亂晒龍，太太在屋企煮飯，佢就走嚟「銀袋」一個人思索吓經濟前景，大跌市之時，無論係手頭上有冇股票，總會間接被火燒嚫，要維持頭腦清醒至得。
早兩日收到餐廳羅傳來電郵，美國大跌市有人苦中作樂，為英文字賦予新意思，有一啲十分抵死，節錄如下：
CEO（首席行政官）： Chief Embezzlement Officer（首席虧空官）。
CFO（首席財務官）： Corporate Fraud Officer（首席企業詐騙官）。
Bear Market（熊市）：一個六至十八個月既時期，其間兒子冇零用錢，太太唔買珠寶，老公禁慾冇得滾。
Value Investing（價值投資）：高買低沽之藝術。
Standard& Poor（標準普爾）：貧窮係你生活既標準。
Stock Split（股權分拆）：前妻與律師將平均分左你既資產。
Financial Planner（財務策劃師）：你以後唔會打電話畀佢既人。
Market Correction（市場調整）：你買入股票後一日。
Cash Flow（現金流）：自己既現金流落坑渠。
Yahoo（雅虎）：當年你以二百四十美元一股賣左雅虎之後之叫聲。
Windows（視窗）：原來係你以二百四十美元買入一股雅虎，於是一跳而出。
Institutional Investor（機構投資者）：舊年投資者，現住於精神病院（ institution）內。
Profit（利潤）：一個上古時代字眼，現不再有人使用！
（左丁山）2008年10月12日
