專搭霸王車 神奇貓被撞死

英國德文郡有一隻專搭霸王車的花貓，四年來每天登上一輛巴士，到 17.6公里外的目的地逛，到下午就乘坐該輛巴士回家，成為司機和乘客的寵兒，但牠今後都不會坐霸王車了，因為牠早前在追巴士時，被途經的汽車撞死。

八十後要五天工作

最近時興講「八十後」，即二十世紀八十年代出生之一代，年齡介乎二十至二十九歲。一些八十後參加反高鐵行動，究竟會產生甚麼影響，目前未能確定，若云佢哋可以阻止到立法會財委會撥款興建高鐵，呢個特區政府的政治手腕與對議會程序之理解及掌握，就實在太水皮了。

既然咁多人講八十後，左丁山呢輪就主動接觸一小撮在職八十後，多數在二十七八歲之間；首先見到一位中大二年班學生，二十一歲，問佢有冇去示威包圍立法會反高鐵，佢話：「考試要緊，冇去到，或者考完試之後有空再諗，我知道政治系、文化系啲同學比較激；商學院學生冇反應嘅啫，我哋經濟系同學唔見得有反高鐵情緒，或者我唔知啦。」跟住見到幾位在職人士，有會計師，有地盤機電科文，有公務員，有行街營銷人員等等，問佢哋有冇反高鐵，全部都話冇，問佢哋最關心嘅切身問題係乜，竟然答案一致，就係每個星期工作五天，其他皆屬次要。

會計 A去年考到會計師牌，適逢金融海嘯，老闆升佢級，但凍薪，會計 A甚為不滿，想話搵工跳槽，但老闆適時改制，返五日工，會計 A於是繼續做落去。科文 H當年考唔到大學，讀咗副學士，出嚟做機電，已經做咗地盤科文，最近有公司挖佢轉工，條件簡單到極，人工唔使加，只係以前返足六日，家新老闆准佢返五日半，遲啲會返五日喎。行街 C呢，佢話公司堅持每星期工作五天半，長短周欠奉，於是今年下半年整體經濟好轉後，公司內的「八十後」職員辭職甚為頻繁，幾乎冇法子留到啲三十歲以下嘅大學畢業生，令大老闆大為頭痛。其實辦法好簡單啫，工作時間只要改為每星期五天，啲八十後就會留番響度！老友建築邦最近逢星期六都唔使返工，原來公司為加強競爭力，以免員工流失，決定「試行五天制」喎。睇嚟五天工作制之潮流沒法擋，特別係公司要培養年青一代接班嘅話，冇五天制就留唔住啲「八十後」精英以至「八十後」普通職員。

（左丁山）2010年01月02日