出版公司總裁 L博士係左丁山校友，曾留學美國，飲過名校洋水，身價自是不同，唔似得我哋呢類亞洲土炮，有時甚至土頭土腦。近日聽講特區政府有意發展電子書，由教育局負責推動，而教育局內有一位副局長陳維安，學歷極高，以前報紙介紹過佢在普林斯頓讀機電工程，在哈佛讀應用數學（碩士），在沃頓學院（ Wharton School）讀 MBA，長春藤名校之中，佢讀過三間，問你怕未？博士 L如無博士學位，直情差陳維安一皮。消息人士話，孫明揚局長可能係睇中呢一點，委以重任，由陳副局長呢位數學、電腦專才專責推動、推廣電子教科書。
電子教科書有乜好？據講理由一係配合科技社會，理由二係省回教科書印刷，夠環保，理由三就係希望降低教科書加價，減少家長不滿，此乃政治因素也。理由似乎十分充足，實際如何？左丁山向一位資深校友請教，校友話：「似係好心做壞事，用電子教科書並非簡單，要有硬件軟件配套，要老師學生識得運用利用，要家長支持 ──例如在家裝置電腦及上網，你估話咁易咩。」咪以為家家有電腦，基層市民就未必一定有，對佢哋嚟講，上網亦係一筆大費用，兼且會有一個副作用，有啲家長根本分唔清子女對住電腦究竟係讀書還是打機睇電影。
校友就專登問過 L博士，如果教育局大力推動電子教科書，學校及出版社如何適應。據校友引述，博士 L認為根本唔使適應住，因為電子教科書之開發成本高昂，國際間尚未流行，香港家長將來睇見價格貴，一定抗議，令曾特首頭痛，特首一聲令下，電子教科書之議說不定會擱置又擱置。
左丁山係科技盲，仲以為電子教科書係好嘢嚟，點知行內人就猛咁搖頭，睇怕陳副局長即使赤膊上陣，電子教科書胎死腹中，唔好話冇可能。用電子教科書比印刷書本有更大階級性，一旦推出，特區政府肯定受到壓力，向基層學生提供電腦/上網津貼，以社會總成本嚟計，會高過現時嘅印刷教科書。
（左丁山）2009年04月10日
