男拔萃校長張灼祥對記者快人快語，講明自己會延遲退休，原因似乎只有一個，就係以一百三十五元買左匯控，買左幾多，無謂逼佢講咯，尊重私隱啦，但匯控近日作價係五十九元左右，每股已蝕左七十六元，約五十六巴仙，好傷喎。另外，葉劉淑儀議員又話揸住不少「美國銀行」與「美林證券」，因為佢親愛的已故丈夫教落，買美股要買美銀與美林，如果呢兩間公司唔掂，美國都會好唔掂。葉生講得好鬼o岩，想唔到既係美林唔掂，美銀被迫買入美林，變成兩個都唔掂，相信葉劉持有呢兩隻股票，損失嚴重。
新加坡李太何晶又係投資專家，主理淡馬錫七年，去年淡馬錫資產總值損失 31%，唔見幾百億港元，於是雖然佢貴為李顯龍總理夫人，一樣要退位讓賢，辭去 CEO一職，由澳洲人，前 Rio Tinto行政總裁 Goodyear接任。
挪威方面，因石油蘊藏豐富，誠恐有枯竭之日，老早成立一個石油基金，每年由石油收益撥款過去，至今已滾存逾三千億美元，交由一隊專家投資，主管人學歷幾得意，在奧斯陸讀經濟，到美國讀 MBA，去日本神戶大學讀財務，去德國讀哲學，返挪威做大學教授，可講知識豐富，國際視野十足，非一般人可比。後來挪威石油基金覺得投資要有「綠色」、「道德倫理」既規範，於是搵左呢位先生做投資顧問，後來佢成為阿頭添。咁既背景，投資好叻喇啩，醒過我地張校長、葉劉議員吖，點知唔係，去年居然重手買入雷曼股票，輸到吔吔聲，基金全年損失 18%，香港所有雷曼苦主加埋既損失，可能唔夠呢位哲學教授咁多。
哈佛大學叻唔叻呢？巴閉到極，係全球最富有大學，上一個十年度既投資回報（複利增長）係 13%，稱譽全球，哈佛大學每年既總經費有 35%來自基金投資收益，但○八年就遇上滑鐵盧，哈佛基金由三百七十億美元跌至二百九十億美元，跌左八十億美元或 21.6%。教授Ｌ從美國電郵通知左丁山，哈佛基金將裁掉四分之一既職員！從香港著名中學既校長到世界上最聰明醒目之人，皆於○八年投資失利，輸到直晒，怪政府呀，怪上帝呀，上街示威呀？搵民建聯伸冤呀？無謂啦，成年人投資風險自負，怨天怨地鬧政府，不但無補於事，仲會傷身！
（左丁山）2009年02月13日
No comments:
Post a Comment