崔顯威（左）跟鮑文範回想當年的戲院，多的是一份喧鬧及人情味。 攝影：黃文偉
回想兒時，襲人的煨魷魚香撲面而來，加上小販叫賣，勾畫出 70、 80年代電影業戲院門外的景象。自 1869年第一間香港戲院建成至今，光影結合的電影成為我們不可或缺的娛樂。已故港督尤德爵士也是標準戲迷之一，他不時由半山的官邸微服去到就近灣仔的新華戲院看戲，正見證了香港戲院最輝煌的年代。 撰文：何永寧
今日香港戲院商會的副主席鮑文範，是當年一手建立灣仔新華戲院的搞手，他跟商會另一位副理事長崔顯威從事戲院管理超過 30年，見證了電影院最光輝的年代，鮑文範記得當年的港督尤德爵士是標準戲迷，他回想說：「佢好鍾意睇戲，當時新華就專放映一啲題材較新同另類嘅電影，好多時佢秘書一個電話留位，跟住佢就落嚟。我哋當然留番啲好位畀督爺，跟住佢前後嗰幾行位都唔會賣飛，佢一般都係揀冇咁多人嘅下午場嚟睇。」督爺出巡，每次都 4至 5人同行，有時還跟太太拍拖看戲。
過千座置休息室
當年尤德爵士經常留座看電影。
自 1869年首間香港的戲院同慶戲院開幕，香港人就開始投入光影之旅，崔顯威說：「開頭都係做大戲，到後來經濟發達至開始成行成市的電影上映。當時嘅戲院係一座座嘅建築物，因為屋宇條例樓上唔可以有其他嘢，唔似家啲戲院屈喺商場入面。成座都用嚟放戲，你諗下間戲院幾大，閒閒哋都過千座位，入面有休息室放滿一份份戲橋俾觀眾未開場時睇，仲會播埋古典音樂。」
當時看戲算是較高檔的娛樂，一般觀眾都會提早約半小時到戲院，戲橋就是讓他們等入場前用來介紹電影的刊物，當年主打西片放映的鮑先生說：「以前睇西片嘅觀眾都比較高檔次，佢哋會着晒西裝打晒呔咁睇戲，西片一播好似《賓虛》、《沙漠梟雄》咁就成 3個幾鐘，所以中場會有 15分鐘休息，休息室就俾佢哋唞下。」
由於 60、 70年代娛樂較少，看戲成為主要消遣，每到有大片上映很多時一票難求，戲院的職員因利乘便令他們的地位超然，鮑先生笑說：「嗰時買飛難，連睇閘員都好受女仔歡迎，因為搵佢買飛易，所以你話喺戲院做識女仔都易啲。」
一家賞戲最開心
舊時戲院會聘多名畫工繪製戲院門外的大畫。
當時的戲院氣派宏大，一張大銀幕動輒 50多呎闊 30多呎長，還有一層絨幕及絲幕遮蓋，每當布幔拉開，全場的觀眾都會變得鴉雀無聲，非常有氣勢，跟今時今日的迷你戲院不可同日而語。少年時曾做見習帶位的崔顯威說：「以前見好多一家老少老竇老母帶住班 o靚仔嚟睇戲，班細路就最開心，因為戲院門口一定有一大班小販賣嘢，粟米、花生、酸瓜應有盡有好有氣氛，有時啲細路冇買飛坐老竇膝頭都係咁，家陣冇晒呢啲景象。」
回想當時一間戲院票房到畫戲院門口大畫的畫工要聘請 20到 30名員工，今日一所迷你戲院用的人一半都不到，但經營戲院已是雞肋，崔顯威說：「租貴固然係原因，多咗好多其他娛樂選擇啦，加上網絡發達，唔理你幾新套戲，一星期兩星期喺網上已經有得睇，對戲院打擊好大，戲院回本期係電影上咗兩星期之後，但到時上網已經睇到，同埋你睇時下有幾多套戲有足夠觀眾俾你上多過兩個禮拜。」
09年一套《阿凡達》（ Avatar）成為票房神話，但對從事戲院業多年的崔顯威及鮑文範，好些電影流金的光榮記憶仍歷歷在目，回味至今：
利舞臺
當年數一數二設備豪華的戲院，有舞台及大型的絲絨布幕，極具氣派，更為人津津樂道的地方是，利舞臺是當年無綫舉辦香港小姐選舉的地方，見證不少港姐誕生，早年拆卸改建為廣場。
麗宮戲院
當年位於新蒲崗，全港最大的戲院。單是座位就有 3,000，全院分前、中、後座，更設有樓上超等及特等座位。當時服務對象為較低收入階層，以相宜的票價播映二輪中、西影片，成為不少上班族蛇王的好地方。
影藝戲院
日本電影《搶錢家族》（圖）在灣仔影藝上映，創造了一個上映 524日、橫跨 90至 92年的香港電影神話，鮑文範話當年這套電影在外國影展賣了 3年仍無人問津，想不到被香港觀眾受落，他笑說：「早知買咗就發達。」
碧麗宮
建成之初碧麗宮就標榜着它的豪華及票價收費高，前身是碧麗宮夜總會同樣提供表演活動，轉型後最令人回味的就是播出《時光倒流 70年》（圖），戲中珍茜摩爾的溫柔婉雅及基斯杜化李夫的俊朗不凡，加上至死不渝的愛情仍教人盪氣迴腸。
東城戲院
崔顯威指灣仔東城戲院前身是殯儀館，他說：「啲人話廁所有無頭女鬼，有啲員工話瞓醒咗俾人搬咗上舞台。」他承認戲院冷氣較凍、地方大顯得特別陰森，加上東城上手的生意令人容易產生聯想。
No comments:
Post a Comment