英超衰落

曼聯、阿仙奴齊齊在歐冠盃八強賽出局，冠軍決賽冇英超球隊份，係○五年以來第一次，英超盛世是否由今季開始結束，下一季就滑坡，由西甲取而代之？五年來，每次決賽都有英超 Big 4份兒，兩次奪標（○五年利物浦，○八年曼聯）。○八年最巴閉，由車路士大戰曼聯㖭，今季竟然四強不入，睇落下一季更難樂觀，原因係：（一）利物浦首先衰落，下季有冇資格參加歐冠盃，尚成疑問，分分鐘由曼城或熱刺取而代之；（二）阿仙奴球員年輕有前途，但除咗費比加斯之外，缺乏世界級球星，如巴塞在夏季以五千萬鎊將費比加斯帶回巴塞，阿仙奴班球員難成大業；（三）曼聯球員老化，傑斯、史高斯、加利里維利隨時收工退休，雲達沙已三十九歲，中堅費迪南與維迪亦三十過外，當打當弗球員只有中場費查、前鋒朗尼、翼鋒華倫西亞與蘭尼，除朗尼外，冇一個世界級水平，表現時好時劣。貝碧托夫唔啱球隊戰術，費 Sir點樣執正隊波呀？大清洗，大換血乎？球會負債七億英鎊，五行欠水，難搞啲喎；（四）車路士球員嘅年紀更大，活力不及從前，林柏特、泰利、杜奧巴呢條脊骨，已經搏到殘，搏到盡，今季或可奪英超冠軍，下季唔會有進步嘅嘞，呢隊波正是逆水行舟，退易進難。曼城又點呀？防守力不足，中場創造性唔夠，唯一有前途新血就係亞當莊遜，仲未完全成熟。

以此觀之，下季歐冠盃仍然係巴塞天下，唯一大勁敵就係皇家馬德里。皇馬用錢堆夠，一樣負債纍纍，財政唔夠安定，散起來亦好易啫。巴塞就唔同，美斯、恩尼斯達、沙維、碧基、保贊等主力全是青訓產品，唔使錢買嘅，球會唔使為錢擔心，仲大方到將球衣心胸標誌送畀 UNICEF，唔收億億聲（歐羅）嘅商業贊助費，如果講球會嘅社會責任，巴塞應該攞梗世界第一。皇馬在歐洲冠軍球會盃歷史上，自一九五六年計起，攞過九次冠軍，三次亞軍，只有 AC米蘭可以比較（七冠四亞），巴塞（四冠三亞）仲有排追，但以後三四年只要美斯維持健康體態嘅話，歐洲球會足球係巴塞天下，殆無疑問。

（左丁山）2010年04月13日