賓架 A係中層經理級職員，負責銷售投資產品，包括所謂結構性產品，例如與外匯掛鈎存款、 ELN、"I kill you later"之類。呢啲產品自發生雷曼迷債風波後，曾一度人見人怕，避之則吉，但投資信條之中，最重要一條，唔係安全保本喎，而係追求回報，以香港人之脾性，賭窩輪，賭期權，短炒股票、期指，無一不愛，令星加坡人目瞪口呆，在香港投資者面前，似是大鄉里，邊會話喜歡零息港元存款咁穩陣吖。賓架 A話：「自股市樓市去年反彈之後，我哋啲客戶又試買掛鈎產品啦，佢哋話點都唔鍾意低到無可再低嘅定期存款喎。」生意好轉，賓架 A有數交，自然輕鬆，不過近日股市大幅度波動，令啲結構性產品價格隨之波動，賓架 A就緊張起嚟，特別係諗起證監會要趕及六月廿五日刊憲，六月廿八日實施嘅「銷售冷靜期」，就更加擔心自七月開始，會不時同客戶發生爭執。佢舉個例，六月二日買入 ELN，到咗六月八日，經過五個工作天冷靜期，因外圍大跌，客戶分分鐘要止蝕，中止購買協議，而銀行嘅平倉損失就要客戶賠，大家一定鬧得不愉快。
買樓有五天冷靜期，價格變動未必大，容易處理，結構性投資產品價格可以忽上忽落，係難搞啲嘅。但新嘅保護投資者措施，係政治需要，政府要「被見到」（ to be seen）有做嘢吖嘛。據英國、澳洲嘅同類冷靜期實施資料，原來只有不足百分之一嘅投資者會在冷靜期內改變心意。為咗低於 1%嘅人，咁大陣仗，增加咁多成本嚟「保護」佢哋，咪好唔化算？騎騎，精於政治嘅英國、澳洲政府點會唔知吖，政治掛帥嘛。
賓架 A就認為證監會多餘，好學唔學，左丁山叫佢讀吓歷史、政治，會明白多啲。賓架 A承認：「我讀理科出身，大學讀工程，自中四分科開始，未曾讀過歷史！」冇話賓架 A讀書唔叻，事實上，今天只有佢同樣背景嘅畢業生，可以較容易考入銀行。細姪女 L自美國回來，英文好到冇得頂，上網申請滙豐，一考數就肥咗出局，反而三個其他細姪女係讀工程嘅，全部入咗滙豐做。世姪女主修生物，話對數學冇咁精喎。當今銀行重數學不重歷史、政治，他日在高級人才方面，技術型專家就多，通曉社會政治嘅人才難求，不無缺陷。
（左丁山）2010年06月11日
No comments:
Post a Comment