暑假已完，一切生活回復正常──即係話馬照跑，波照睇，周末好唔得閒咁解，睇波當然係睇英超為主，西甲、意甲、德甲為輔。今季好想睇西甲巴塞與皇馬爭奪戰，可惜西甲比賽時間太夜，除非係皇馬對巴塞啫，否則邊有興趣捱眼瞓去睇波吖，故此睇波仍然係睇英超為主。如果西甲想增加海外電視轉播收入，球賽時間要提前至得，不過踢夜波乃西班牙人民族習慣，幾難為金錢而改變。
皇馬過往兩屆居巴塞之後，今年本來仍然睇低佢，但請咗神奇教練摩連奴做教練之後，唔敢抹殺皇馬之冠軍希望噃。二○○○/○一年度開始嘅十年，皇馬與巴塞各得四屆冠軍，華倫西亞兩次奪標，由○四年開始，巴塞贏四次，皇馬贏兩次，可見呢兩隊雄霸西甲，其他隊伍難以挑戰。摩連奴謀略第一，究竟有乜辦法力壓巴塞呢？相信係全世界球迷最想知道嘅。巴塞喺第一場就已經表現出色，韋拿融入球隊，與美斯、沙維等合作得絲絲入扣，放走伊巴謙莫域，換入韋拿，攻力有增無減，何況新簽中場悍將馬斯查蘭奴，分明係用來應付皇馬希古思、 C朗，與皇馬中場硬撼嘅，全隊攻守比上屆更平均；反而皇馬第一場對馬略卡就無法入球，全隊新埋班球員太多，合作未慣熟，季初有可能俾巴塞放甩，摩連奴如果真係可以率領皇馬稱王，要封佢做「球聖」、教練之王。
英超方面，睇嚟睇去都係車路士、曼聯爭標，阿仙奴可以威脅吓，攞第三名就比較穩陣。曼城與熱刺竟然可以分別輸俾新特蘭及韋根，可見實力雖有，水準不定，難以給人信心，與利物浦爭第四名就差唔多，阿士東維拉兵微將寡，打到尾就無以為繼，今季得第七名已算達標。降班邊緣隊伍方面，韋根、西布朗、黑池、史篤城、韋斯咸、狼隊等恐怕有排捱，睇吓邊兩隊可以逃出生天，呢五隊都係實力有限，兵源不足之流，在英超立足全憑一股鬥志與若干運氣，成季流流長，到咗明年三月後，球員就開始散散哋陷於苦戰嘅嘞。
（左丁山）2010年09月02日
No comments:
Post a Comment