炒左丁山

一位讀者傳來電郵如下：

「 I am a forty years old reader of appledaily for almost as long as your paper printed. Ever since about"Mr you" talk about the五區公投 issue and now the議員何必學成龍. I strongly suggest to appledaily that he should not in the名采 page anymore.
Please consider.
virchow」

上次本欄寫政改方案，反對公投，支持溫和民主派，惹來不少謾罵，有讀者叫左丁山唔好再寫《蘋果》專欄，估唔到今次又有人叫《蘋果日報》郁手，炒左丁山魷魚。老實講，所有報紙專欄副刊如超市貨架，乜趣味稿件都有，你話陶傑崇洋，咪唔睇佢囉；你話左丁山保守，咪唔好睇左丁山囉，何必叫老闆炒人呢？一個讀者話炒，點知有冇兩個讀者要留呀？假如〈名采〉版嘅作者千篇一律，意見歸一，或者全部唔講政治，只講吃喝玩樂醫療保健嘅，你估又會唔會比咦家咁嘅版面更加吸引讀者呢？

在「五區公投」、「政改方案」方面，左丁山與黃毓民完全唔同意見，但我地仍然久唔久就傾吓偈，有時在陸羽碰頭，嘻嘻哈哈。半個月前，毓民約左丁山及其他傳媒朋友到九龍城廣場「毓民牛肉麵私房菜」吃午飯，晨早就親自去街市買魚買菜，整啲地道潮州菜式出來畀大家見識吓，毓民送畀大家一本《人民最大：五區公投實錄》，佢話留下歷史，等時人、後人明白多啲喎，跟住在我地面前大罵民主黨，大罵何俊仁，一邊食，一邊鬧，好不高興。正如一句西方老生常談，相傳係伏爾泰（ Voltaire）講嘅，但未有百分百證據，就係："I disapprove of what you say, but I will defend to the death your right to say it"，人地嘅意見聽唔入耳，就要唔畀佢寫？霸道啲喎。

左丁山一位朋友雷鼎鳴教授在《信報》發表長文，不乏精彩之作，佢在八月三十日發表一篇「香港樓價高企的原因」，引學術文章資料，解釋高樓價，如有人不同意，大可寫番一篇三千字長文反駁佢嘅學理及數據，但網上即刻有人大罵雷教授向地產商獻媚，諸如此類，而提唔出甚麼理據，此乃時下網民罵人通病，不算係辯論或討論，只係情緒發洩而已，邊會受人重視吖。

（左丁山）2010年09月07日