移民香港

前些時聽基金 F談及，會有金融界高層人士自倫敦來港定居，以避高稅率。邊啲金融界國際級人物來港，左丁山唔識，估唔到呢日在陸羽碰到一位二百幾磅，一個人可以坐兩個位嘅法國酒商 S，佢舊年走過上嚟飲茶嘅嘞，喺餐飲 R嘅供應商，大家老友鬼鬼，問佢來港有何貴幹，酒商 S話：「我移民香港呀？」左丁山幾乎嚇咗一跳，法國富有酒商，有酒莊，有法國南部別墅，享盡法國美酒佳餚，做乜要移民香港，貪香港空氣污染，濕度高，天氣熱乎？

酒商 S幾幽默：「唔，今日三十五度，維多利海港上有藍天白雲，同法國差唔多啫，我移居香港，一定會好習慣。」諗諗吓，佢之捨法國取香港，應與中國市場及香港撤銷咗葡萄酒稅有關，佢話上個月先至在法國招待中國豪客團，自己上過北京幾次，認為中國市場潛力龐大，要做中國生意，不如索性一家五口搬來香港，在半山區租豪宅居住，雖然所費不菲，對佢嚟講，濕濕碎啫。

富商來港，除咗支持豪宅租金外，亦會創造職位，起碼佢已經去律師樓註冊新公司，預備銀行開戶口，銀行那敢怠慢，立即應承全力配合。富商 S帶埋財務顧問來港打點，財務顧問係英國人，對香港甚有認識，食完陸羽叉燒包之後，佢同左丁山講：「香港係有效率嘅，我係牛津校友，去銀行見到一位劍橋畢業嘅高層，好多嘢立即在原則上傾好咗。」英國係牛劍世界，呢兩間大學嘅畢業生，係容易傾得埋嘅！就好似喺日本政商界高層好多係慶應、早稻田、東京大學學生，經常互相畀面。有一次左丁山見到一位日本銀行高層，佢係慶應校友，講起一位政治政壇人物，不屬早應與東大校友，佢就哼一聲咁講：「佢係××大學嘅啫。」有時候要入讀名校，未必一定求到優質教育而係要建立人際網絡，以備後用。酒商 S可能唔係第一個，亦唔會係最後一個歐洲富商來港定居，香港要做國際城市，伸開雙手歡迎佢地啦。

（左丁山）2010年09月03日