中貿林到俄羅斯旅行，去到聖彼得大堡，留下深刻印象，覺得好有古典美，但最令佢要拍照留念者，係在城市海旁，見到一個大到無倫，直情成個尖沙嘴咁大嘅地皮，上有中文招牌（簡體字），寫住「波羅的海明珠」，係一間叫做「上海建工」嘅公司樹立嘅，據導遊講，此幅地皮租予一間中國公司使用，租約九十九年，中貿林為之嚇咗一跳，唔通係中英「九龍租約」翻版？不過導遊話，中方冇管治權，並不構成「華租界」。中貿林讚嘆曰：「中國人有的是錢，教俄羅斯人大開眼界，你地仲係蘇聯大阿哥乎！」中國公司夠膽去俄羅斯買下龐大地皮使用權九十九年固然夠晒氣魄，但在商言商，如何回本賺錢呢？中貿林對地產投資素有研究，對此亦諗唔通，難道叫溫州幫到波羅的海炒樓？
中國改革開放三十年，成為世界第二大經濟體系，俄羅斯有優厚工業底子，點解改革開放二十年，經濟上還是只靠石油、天然氣出口呢？以前有人講過，俄羅斯冇香港與台灣吖嘛─即係海外俄僑嘅經濟實力遠遠不如中國華僑，開放初期缺乏海外資金流入，舊式重工業難以轉型，反而因為耗能高，產出低，成為經濟負累。香港對中國發展嘅貢獻好大好大，開放初期，唔係香港投資，香港廠家北移，深圳及其他沿海城市邊度會開發得咁快吖，到咗九十年代，台灣工廠亦向大陸投資，港台商人全力打造中國輕工業製品出口，接收天下訂單，於電子、玩具、成衣等工業稱雄世界。今時今日，深圳特區成立三十年，內地人有錢，香港人成為阿燦了，但三十年前沒有海外華僑資金，尤其是香港資金嘅話，中國會叻過俄羅斯幾多？此則有待經濟學家去研究了。
朋友黎文卓啱啱出版一本新書《十三億分之一》，三百二十九頁，講中國情況，黎文卓寫完之後，出版之前，加多一個後記，有九點感想，講「中國真的是在真正進步中，等於一個長期拿二三十分的學生，取得了六十分，是進步學生，並非優秀學生。……今天香港優勢不再，成為龜兔賽跑的白兔，香港人必須重新檢視自己的目光和心胸，才能幹大事，有大成就！」
（左丁山）2010年09月10日
No comments:
Post a Comment