澳洲前總理陸克文，上任時民望極高，因澳洲經濟近年幾倚賴商品市場之興旺，特別係中國對澳洲礦產之需求升跌，足以影響澳洲 GDP增長。陸克文精通中國語文，能與中國溝通，仲唔係做總理嘅適當人選？陸克文上台前，大力推動氣候法案，環保人士嗒晒糖，點知上台之後，方知講就易，做就難，環保人士大為不滿。佢又認為礦業興旺，可以開徵暴利稅，當然俾礦業大力反對又反對啦，邊個贏呀？商界囉，陸克文民望大跌，黨員不滿，上月黯然下台，副手吉利德就任總理，好快就與礦業傾掂達成協議，暴利稅已遭剔除。嘩嘩嘩，如果呢啲事在香港發生，仲唔俾人狂抦黑箱作業、官商勾結，吉利德女士為退休後做足工夫？
澳洲係唔係政治社會穩定嘅民主國家、東南亞人民希望移民嘅國家？係啦。都話咯，民主選舉國家最多政治妥協，選民不以為政治妥協係甚麼違反原則之事，有甚麼不滿，選民可以在下次大選投票，趕走現任政府。香港有人話民主黨投票贊成政改方案嘅議員，應該全部辭職，等候補選喎，根本係笑話，要趕佢哋走，還不容易，二○一二年就係機會嘞。美國之金融改革法案由民主黨眾議員 Dodd、 Frank兩位提出，初時遭受不少共和黨議員反對， Dodd話明為求取得足夠票數，乜都可以妥協，大前提只係不能呢方面得一票，另方面就失去一票，佢話到明：「唔會有人得到百分百嘅願望。」意思即係話人人都要 give and take，僵硬堅持者可以行開，或者堅決反對者可以繼續反對，一切等票數決定，美國議會有此妥協傳統，故此美國人對香港政改方案達成妥協，並不奇怪，駐港美國總領事仲要與傳媒會面，親自講贊成添。
公社聯盟之內，公民黨一班大狀，都係英文人，加埋反黨嘅民主黨元老李柱銘，個個都可以對住美國、英國、澳洲、歐盟嘅領事用英文解釋佢哋點解反對政改方案，不過外國人在妥協環境中成長，都怕幾難理解佢哋誓死反對，不肯妥協嘅道理。
（左丁山）2010年07月08日
No comments:
Post a Comment