股東不和

成功家族生意，如果未上市，本是家族嘅現金牛，或者係能生金蛋的金雞。偏偏不少家族生意在創辦人逝世後，就會發生爭產糾紛，今年報紙就報道過阿嫲與阿孫，仔告老竇，兄弟互控之事，如果有人將○八至一○年三年間發生之家族不和，爭產事件嘅法庭資料詳細收集，改寫成一本「香港爭產案」，相信會好好睇，明年書展，一定熱賣。

最新嘅一單當然就係鏞記兄弟案，大佬甘健成（甘琨勝）入稟法院將 Yung Kee Holdings Ltd.（ YKHC）呢間離岸控股公司清盤，細佬甘琨禮反對，於是鬧上法庭，不少罕為人知嘅資料得以揭露。正是清官難審家庭事，內裏家族關係如何難以判斷。但從雙方代表大律師在法庭上所披露嘅資料嚟睇，呢件事又唔係咁複雜喎，只係一單好標準嘅大股東與小股東意見不和嘅事件，商場上時有所聞。左丁山本身亦曾親自勸解過同類事件。

好多家族公司或以前基於朋友、同學關係而成立嘅公司，股東之間十居其九沒有簽署一份「股東協議」（ shareholders agreement），於是遇上大家有意見不同，利益衝突之時，便無所遵循，一旦傾唔掂，唯有法庭相見。正所謂共患難易，共富貴難，公司唔賺錢，冇人想理，利潤滾滾而來之後，股東間就多想法咯，一啲話要擴充，一啲話要保守，一啲話要派息，一啲話保留現作，點算好？公司如果有股東協議講明董事薪金、員工花紅、派息、供股、售股、反攤薄等等條款，就可以照章辦事，否則嘅話，爭拗起來，單一大股東持有 51%股權（或者三四位加埋成為一個大股東）就會話晒事，揸住 49%或以下嘅股東只有捱打，以前左丁山就見過一位朋友Ａ持有 45%股權，畀其他三位加埋一共持有 55%股權嘅股東欺凌，飽受排擠，方法包括：（一）不派息，用滾存現金收購資產；（二）三位股東兼董事聯手在董事會通過大幅度派花紅，及董事房屋津貼；（三）每隔兩三年就嚟一次供股集資，攤薄朋友Ａ嘅股權，朋友Ａ供股又死，唔供又條氣唔順，卒之棄械投降。

（左丁山）2010年07月18日