上一代人含蓄，迷戀明星，愛用「暗戀」方式，間中好命水撞見偶像，都嚇得呆若木雞，近乎「 O」嘴。這一代歌迷追星，舉牌送禮物追車嗌口號乜都做齊，慌死你睇佢唔到。多得先進的科技，各地粉絲團得以聯結同盟，天涯海角，誓死追隨。
記者：葉雪芯
攝影：楊錦文（部份圖片由被訪者提供）
有系統營運粉絲團
剛過去的書展首天，港聞鏡頭中排頭位衝閘的不是 o靚模粉絲，而是傅穎（ Theresa）的 T's Family。佢哋一邊嗌住「 Theresa、 Theresa」，一邊舉晒閃牌 Banner浩浩蕩蕩地操入書展會場。搞手之一 Maggie亦有份策劃這次活動，她今年廿字尾，由 Cookies時代開始迷戀 Theresa，「都鍾意咗 8年，唔會變心喇！當初都係自己一個去 Function，諗住望吓偶像，見到佢就開心。後來慢慢在公開場合見到好多其他 Fans，就聯結一齊，最後成立 T's Family，咦家會員有二百幾人。」她說，以前的的歌迷會都比較鬆散，凝聚力差，現在這一代好有系統。 T's Family幾個領導人都比較年長，帶領住一班小妹妹去支持偶像，「大哥哥大姐姐有人生經驗、處事能力、組織力都比較好，講句說話都有人聽，班小妹妹都幾聽話，大家好有規矩好有秩序。」
■ Maggie是 T's Family幹事之一。
■只要有機會見到 Theresa， Maggie（左一）怎樣都值得。
唱片公司通風報信
以前的粉絲要得知偶像行蹤，要揭報紙雜誌睇「追星表」才略知一二。現今粉絲團消息靈通，如此緊貼偶像消息，多得唱片公司和經理人公司通風報信， Maggie續說，「我哋一路都有同 Theresa的公司聯絡，早前雖然佢同舊公司有合約問題，中間有一段時間無乜活動，不過佢一轉到新公司，新助手和新經理人好快又 Catch-up返我哋，有時會幫手留起簽名籌或者通知我哋去首映會，上下一心咁撐佢囉。」不止有能力組織香港的粉絲團， Maggie說靠科技還可以聯結大陸、美加等 Fans一同撐場，「上一代 Fans同 Fans之間好難先可以有系統咁聯絡，不過咦家呢一代 Fans，就梗係方便好多啦！我哋有 facebook，又有微博，仲可以上網開 Forum、寫 Blog，通消息好快。好似上年 Theresa去加拿大登台，我哋都有幾個 Fans過去，一去到就可以搵番加拿大的 Theresa Fans；今次書展，廣州又嚟咗十幾個 Fans，我哋同佢都好熟，閃牌兩份用，佢哋喺書展開幕前一日已經排定頭位，通宵咗一晚。」
鍾意她真正關心我
20歲的 Winnie正在讀大專，問到 Winnie鍾意 Theresa甚麼？「我鍾意佢份人夠 Nice，好好人。」同人傾幾分鐘偈就認定係好人？她解釋：「唔係咁， Theresa唔係當我哋米飯班主所以對我哋好，佢會問我哋功課做成點，最近有無唔開心，好關心我哋。有時我哋見到佢就送禮物送花，佢都叫我哋唔好嘥錢，唔好浪費，不如用啲錢去做善事。所以我哋都曾經組埋一班粉絲團去參加賣旗。」迷偶像人人試過，但父母總會擔心吧？「起初爸媽都有擔心，叫我唔好太過份，但我都會分配好時間，而且用在追星的錢不多， Fans Club年費都只係$160，好多使費已經包括在內，頂多係付出交通錢同時間，有啲後生仔去唱 K去玩都用咗啦，所以咦家爸媽都無反對。同一班 Fans已經做咗朋友，大家一齊出嚟玩，一齊支持自己心愛的偶像，都好開心。」
■ Winnie，大專學生，鍾意了 Theresa五年，她說不會變心。
a.有強大的粉絲團撐， Theresa自然識做同佢哋留影。
b.全港港聞記者影到的頭批書展衝閘人士，正是 Theresa的粉絲團。
c.今次書展有不少廣州 Fans早一晚已到場排隊排通宵，兩地 Fans全靠微博聯絡。
d.間中會送上小禮物予 Theresa，例如祝她鯉躍龍門的金魚公仔，但 Winnie說 Theresa成日叫佢哋唔好嘥錢。
多得互聯網幫手組團
亞太區最受歡迎男歌手林峯，果然實至名歸，事關 Fans人數的確遍佈亞太區。香港 Fan Club「 Fung Forever」話事人之一 Julenna說，剛於星期二晚開騷的林峯演唱會中， Fans來自四方八面，「大陸、歐美、加拿大甚至比利時的都有來撐場，佢真係好受歡迎。我哋梗係覺得佢實至名歸，阿峯去年在拉斯維加斯開演唱會，門票好快就賣晒；佢喺大陸的 Fans真係好多，有時去廣州搞一次宣傳活動，動輒都有上千人。」
Julenna說， Fan Club成立了短短四年，現時已經有千多個會員，老中青三代都有。每次出席公開活動撐場都有二百多人，聲勢非常浩大。她認同這一代追星， Fans聲勢可以咁強勁，都多得互聯網幫手，「咦家我哋有好多活動都靠網上互通消息，尤其好似阿峯嘅 Fans遍佈東南亞咁多地方，一定要靠 facebook同埋微博來溝通。就算 Fans唔可以到現場支持阿峯，我哋都可以即時 Post相或者留言。」偶像的魅力和人氣，當然要靠 Fans與 Fans之間的凝聚力，互聯網在這方面就發揮了很重要角色，「香港 Fan Club是總基地，我哋在世界不同的地方都有 Helper，例如收會費或訂演唱會門票，就要靠 Helper去組織籌備，然後再同香港總部聯絡，所以 Fans之間聯繫緊密，有活動大家都希望參與，閃牌、禮物都係大家一齊 Share，人人都有份出錢出力。」
e. Julenna說，每次出席林峯活動的 Fans都來自全球四方八面，少則幾十人，多至二百多人。
f. 亞太區最受歡迎男歌手，外界笑稱是「亞皆老街至太子道最受歡迎男歌手」，但在 Fans眼中，當然是實至名歸。
g. 林峯 Fan Club有綠黃色會服，雖然要自費出錢買，但班 Fans極齊心，次次出席活動都整齊穿上，勁有組織！
h. Fan Club唔止冧偶像，間中仲會做善事，例如剛於上月，「 Fung Forever」就是捐錢最多之一的團體，仲收到感謝狀。
i. Fans非常有心思，勞心勞力自製了不少禮物送給林峯。
j. Julenna說， Fan Club內會員已經成為了朋友，就算有時不為偶像，都會出來搞搞聚會，聯誼一番，這樣也有幫助提高 Fans之間的凝聚力。
k. 你睇林峯收到幾冧爆！
l. 偶像開演唱會咁大件事，明星相、海報等等道具當然一應俱齊。
No comments:
Post a Comment