■（左至右）：羅振邦、黃耀富、謝德謙、陳文俊
城市論壇有維園阿伯每星期大鬧，旺角球場一樣有班阿伯嘈嘈閉，怨這一代的球員不會踢波，只會做明星、代言、叫人起錨、蒲、滾、賭。香港甲組球隊公民四子羅振邦、黃耀富、謝德謙、陳文俊，經歷過本地球壇最黑暗時代，今時今日依然年復一年有癮踢下去，甚至有人走了又回來，為的，只是繼續為香港足球圈出力。
記者：葉雪芯
攝影：伍慶泉
這一代太多娛樂
羅振邦 司職：公民中場
■ 2003年東亞足球錦標賽中羅振邦開始受人注意，多次靠速度衝破對方的防線，羅振邦和前隊友黃鎮宇同受到當年日本隊總教練薛高的讚賞。
羅振邦，入行 11年，幾乎香港所有甲組球會都踢過。爸爸為六七十年代本地球壇的著名守門員羅灶石， 8歲時父親帶他參加暑期足球訓練班，開始對足球上癮。足球世家，但入行卻是由街場踢起， 19歲入甲組再入港隊。不料當年媽媽大力反對，「阿媽始終想我讀書。踢咗兩年左右，成績唔係特別好，爸爸係嚴父，我交唔到『功課』，連佢都叫我唔好再踢，趁早轉行。我有諗過放棄，但興趣就係興趣，唔係一時三刻放得低，後來轉過一些球會再努力爭取成績，踢番好啲老竇就唔會再鬧。」對於舊一代批評新一代球員，阿邦說：「年代唔同啦，好似我爸爸嗰一代，少娛樂，除咗踢波睇波，仲有咩玩？所以佢哋踢波好投入，滿足感大好多！我哋呢一代，又唱 K又睇戲又上網，太多嘢玩，所以入場睇甲組都少咗人啦！」關於前途，阿邦說：「讀緊一個體育管理的大學學位，暫時未知退役點算，睇際遇吧！」
■阿邦說：「舊一代球員收入可觀，就算學識唔多，退役後只要肯學肯做一樣搵到食。我哋呢一代唔得啦，逼住要打算。」
■羅振邦爸爸羅灶石為香港元老級球員，司職守門員。即使自己是球員出身，但眼見兒子當年成績麻麻，都曾力勸阿邦轉行。
球隊一定向錢行
黃耀富 司職：公民後衞
「政府最無腦，完全無發展過足球！無錢無支持，仲叫人點踢落去？」同樣是入行 11年的黃耀富（富仔）說，香港球壇從來無被政府重視過，就算剛過去的東亞運帶來了一陣小陽春，現在又還原基本步：「其實一支球隊係一定要向錢行，要商業化，無錢無人工，唔使開飯咩！政府只要撥多些少資源，多幾個球場，就算養草、清潔都可以增加就業。政府行頭已經可以吸引人投資一隊波，外國做法都一樣。」其實早年他曾經跳出球圈做了其他工作，後來再重投足球員生涯，他說：「一般人好難明白我哋心態。我習慣咗球圈，真係鍾意踢波，你叫我坐定定喺辦公室打字，要做有幾難？但係會變咗行屍走肉，返落球場踢波先識得生猛晒。」但少人睇香港波，有乜成功感？富仔坦白笑說：「間中有啲傳媒訪問，入咗波間中又有得上報紙，有時又俾《球迷世界》影到，有些少曝光率，朋友見到又覺得幾威咁，算係有啲虛榮心囉，一定有嘅！」
■富仔間中會到學校向學生教授球技。
支持球員明星化
謝德謙 司職：公民守門員
■（左至右）黃耀富、謝德謙、陳文俊私底下都是朋友。
85年出生的謝德謙（謙仔），正值年輕「當打」之年。入行 6年，聽了不少上一代說現在的球員體力差，他有不同睇法：「足球已經轉變咗，球例又唔同，以前後衞扭一大輪傳番龍門又得，家已經唔可以咁玩，一定要去，體能需求更大；家講求戰術，唔再係一頭牛直衝，要用腦。練波已經好有系統，可能係特別加強鍛煉某一些肌肉。舊一代成日想當年，我知道當年好威，砌低日本韓國，但係當日本韓國進步時，香港又做緊乜？係因為日本韓國，國家一早就大力推動足球運動，設備硬件樣樣都好先進，但香港所有設備硬件都仲係停留緊當年，如果要咁樣比較，好唔公平。」所以，謙仔直指支持球員明星化，始終有知名度對整隊球隊都有幫助。
■謙仔對足球百分百有熱誠， 08銀牌賽，當時輸畀南華令他很傷心沮喪。
陳肇麒
單靠踢波難搵食
陳文俊 司職：公民後衞
■文俊同意，這一代的球員，體能方面不比上一代當年差，因為所有練習都有系統有目標。
「南華全華班、降班、沙士……球壇最差的時代已經捱過咗。我做學徒時，得$500一個月，搭車都唔夠，要自己出去賺外快繼續踢，除了熱誠，我真係諗唔到點解自己可以咁樣踢咗 11年。」單靠踢波難以搵食，文俊不用踢波的時間，就會去教小朋友踢波，又睇到另一個香港球壇暗淡的原因：「我教中學生踢波，有啲教咗六、七年，去到尷尬位就係選擇期，佢一定要揀讀書還是繼續踢，呢啲統統都關係到前途。十個有八個家長，都反對小朋友去踢波，當興趣玩就得，做職業？唔使旨意。成個社會風氣形成咗好似唔做醫生律師、唔搞金融地產就等於無前途。足球體育好難發展，足球員都青黃不接出現斷層。我有幫手勸，解釋一下利弊，但成功率好小。」
香港大球場惟有遇上大型國際賽事先會爆滿，例如「亞洲足協盃」等。
足球商業化
1. Panasonic既為南華贊助商，同佢哋宣傳番 3D Plasma電視都算係應份。
2.謝德謙也有出席一些商場活動宣傳，他不反對球員明星化：「有知名度對球隊都好。」
3.陳七連政改廣告「起錨」都撈埋，不過出街後有少少後悔囉！
4.陳七上埋娛樂版頭條，最大得益是將知名度滲透女觀眾層。
5.安信兄弟同南華，都可以有 crossover project。
No comments:
Post a Comment