恒生可持續發展企業指數

與史丹利、調解Ｃ傾咗一陣，就走去恒生銀行博愛堂參加恒生指數有限公司之「恒生可持續發展企業指數系列」開展禮，估唔到有咁多中外人士到場，在地下要排隊入升降機上二十四樓，可見呢個可持續發展企業指數有好大吸引力。

上到博愛堂，只見人頭湧湧，除咗好多記者外，仲有各大公司代表、外國領事、基金經理等等，首先見到有基金教父之稱嘅老牌基金經理大衞Ｌ。大衞話環保、 CSR、可持續發展等等，係今日企業界之 buzz words（口頭禪），人人掛在口邊，呢個新恒生指數食正條水，正合時宜。係唔係入到呢個「可持續發展指數」嘅公司，股價會得到多啲投資人士追捧呢？大衞話未必一定，始終要睇基本財政表現與實力，但無可否認，近年興起 CSR投資基金，入到呢個指數嘅公司，理論上會受到呢類基金鍾意，成為佢哋嘅投資對象。

跟住見到一大批女士，全部係超級大型公司嘅公司事務總監/傳訊部總經理，例如羅拉、美美、瑪嘉烈、艾麗絲、艾蓮呢班大姐大，呢個部門好似係女士禁區，男人勿近，好彩主人家恒生銀行嘅傳訊部阿頭係張先生，否則男人在企業公關界冇碇企。

咁多公關阿頭到場，除咗一啲有份上台接受財政司司長曾俊華及恒生行政總裁梁高美懿頒發成份股紀念座之外，亦要乘機推廣公司形象，一位總監對左丁山講：「企業傳訊部咦家多咗好多新事物，新任務，例如社會企業責任（ CSR）、可持續發展等，全部撥入我哋部門負責跟進。入到恒生可持續發展企業成份股，我哋公司暫時睇唔到有乜着數，但如果入唔到，就冇晒面子，他日如果俾呢個指數剔除，更加弊！」

咁講法，大企業注重 CSR與可持續發展，既為社會、亦為私利，按照亞當史密嘅講法，追求私利係推動社會進步之最大力量，只講口號與政府干預，為咗做騷而已，並無多大效用。

（左丁山）2010年07月20日