泰國暫時恢復穩定，旅遊迅速反彈，據旅行社總經理Ｓ通知：「喂，左丁山你最鍾意去泰國，唔該你早啲安排，咦家啲機位好爆呀。」咁巴閉？不久之前先至話要救亡啫噃？總經理Ｓ話：「香港人始終最鍾意日本與泰國，但日圓強勁，日本物價又貴，若慳啲使最好就喺去泰國 o架啦，另外或者去星加坡，自賭場環球片場開幕後，港星航班非常緊張，手快有，手慢就唔該你去吉隆坡。」泰星日乃暑假三大旅遊熱點─當然上海世博已經熱爆，港龍每日有十三班機去上海，好似開巴士咁開，港龍老總Ｔ話幾乎班班客滿，係前所未有咁好景。
泰國土地肥沃，農產品豐富，人民不愁肚餓，只要政治穩定。紅衫黃衫軍如果唔好鬥激進，溫和啲做事，達成妥協，泰國一定冇衰嘅！激進路線通常害死國家，大家一人讓一步，社會先至得以穩定。香港啲激進派雖然冇動作，其言行已足以教壞下一代。講番泰國，目前最需要做嘅係阿披實政權不可偏幫黃衫，要用懷柔政策吸納紅衫軍，使紅黃共同為國效命，此乃長期政策，短期政策就係維持經濟增長，金融穩定。
泰國央行行長泰列莎女士退休，政府立即委任泰國銀行公會主席、 Kasikornbank（泰華農民銀行）總裁 Prasarn Trairatvorakul博士（華裔，姓張名旭州）接任央行行長。呢位張旭州博士今年五十八歲，大有來頭，一九七四年以一級榮譽畢業於朱拉隆功大學電機工程學，一九七六年得亞洲理工學院（ AIT）工業工程及管理碩士，七八年得哈佛 MBA，八一年得哈佛商管博士，曾任職泰國央行、泰國證監會，讀書時係朱拉隆功學生會會長，一九七三年十月十四日泰國大學生發動爭取民主大示威，遭軍方鎮壓，死人數目至今講不清。呢場泰國天安門事件展開泰國人爭取民主反對軍人獨裁之新一頁，當時呢位帕訕同學與其他大學學生代表，與獨裁首相乃他儂元帥開會，談判釋放示威學生，可以講得係一位讀書非常醒而且又同時瞓身學運嘅叻仔，讀完書投身社會做事，表現優異到極。香港今日某一啲學生會領袖唔該以 Prasarn為師，好好地貢獻社會，唔好畢業後仲賴在校園內不走，在新一輩學生面前演嘢，而唔敢或不願在成年人職場奮鬥。
（左丁山）2010年07月10日
No comments:
Post a Comment