一叠叠潮語卡很好賣，因為父母家長說不要代溝，老師和考評局說要追上時代步伐，急不及待要認識新一代潮語。大家彷彿都有點忘舊了，上一代潮語大家都說 Out，不會講亦不會用，對於八九十後一代，這些是火星文嗎？
記者：葉雪芯
攝影：陳陶鈞、梁細權
Model： benson、 jim@puremodel
翻炒潮語無創意
■彭志銘
談香港次文化，不得不找次文化堂社長彭志銘嗲幾句，基本上沒甚麼潮語俗語粗言穢語可難倒他。
「咦家行街聽到啲 o靚仔講潮語，九成九我都聽得明，因為呢一代香港人無乜創意，潮語十居其九都係翻炒嘅。有啲所謂潮語，根本已經講咗幾十年，照咁睇，其實班八十後仲好懷舊喎。」例子呢？彭志銘說：「 Hea！」甚麼？「 Hea」這個字根本不潮？「呢個人做嘢好 Hea。」「返學得個坐字，都不知幾 Hea。」「 Hea你咪 Hea你囉，使擇日呀？」我經常聽到以上對白，出自中小學生之口，他們靈活運用這個字，當動詞及形容詞用皆可，配合不同句子就可互相溝通，怎會不潮？「人人都話呢個字係潮語，你細個嗰陣無聽過阿婆阿爺鬧人咩：『你做乜又 Hea開晒啲床鋪呀？』呢個字根本係廣府話，意思解作『求其』、『無條理』，絕唔係無啦啦呢一代爆出嚟嘅潮語。」
突出自我存在價值
香港這一代潮語，不止翻炒上一代，還受到互聯網影響，「互聯網太發達，語言傳得太開太快，搞到大混亂，例如『宅男』、『腐女』，擺明受日本影響，又例如『 Kai子』，係台灣黑社會術語，再例如『乜乜門物物門』，係受大陸影響。」每代都有所謂的潮語，這是語言的自動演化，「呢個年代，人人都話班八十後無用，呢班年輕人，惟有講一啲只有佢哋自己族群或相近年齡群先明白嘅語言，大家一窩蜂跟風一齊講，咁先突出到自己。講嘢好潮，潮到我明你唔明，咪證明到自己有存在價值囉。」他還解釋，上一代不少潮語讀音似粗口，意思卻完全是另一回事，不過大家都怕尷尬，反而避正音，演變成這一代人所講的都不是當年的潮語，「『無厘頭尻』呢四個字完全係阿爸阿媽年代嘅潮語，『尻』並唔係指男性生殖器，係尾龍骨最末一節，鬧人『無厘頭尻』係話人無頭無尾、不知所謂，咦家人人都以為『尻』係粗口，避咗唔講，講講吓變咗『無厘頭』，可能呢代人就快連『無厘頭』都唔會講啦。」
1
2
3
4
5
6
7
完
有共鳴方為潮語
■劉天賜
對廣府話有深厚認識的劉天賜，他說上一代潮語早百幾年前已存在，即外省阿伯一定聽不懂的廣州話：「潮語，最重要係大家都聽得明，有共鳴，所以每個年代都有唔同潮語。部份潮語歷史太悠久，追溯唔到來源，有啲仲可以解釋到，例如咦家話人『串』，呢個講法係由文化大革命而來，六七十年代，一省紅衞兵好鍾意同其他省紅衞兵搞『串連』，即係『交流』，當年個個紅衞兵都好囂張又牙擦，所以咪『串』囉！」
電視劇應記一功
上一代潮語發展得很慢，要流行，多數要靠電視劇，「幾十年前，人講你又講，要講到大家習慣晒先算得上潮語。六七十年代開始有電視、播音，潮語開始傳得好快，當時有好多電視劇代表作，劇裏面角色有好多口頭禪，有時為避用黑社會慣常用語而作新對白，講講吓又會變出新潮語。當年大家無太多娛樂，日日對住電視機煲劇，所以潮語入晒腦，好快記得。」
講到帶起潮語的表表者，劉天賜說除了編劇創意，就要數周潤發、廖偉雄、張衞健等人，「發哥實在有太多經典啦，《親情》裏面嘅木咀輝，『木咀』呢個 Terms到咦家都有人用，電影《監獄風雲》裏面講嘅『隻揪』，又係由佢帶起；廖偉雄喺《網中人》演新移民角色，角色名『阿燦』變咗新移民代名詞，演變成咦家嘅『港燦』、『加燦』呢啲新潮語，近代一啲要數張衞健，當年《老友鬼鬼》都好收得，『咪當我 Robert！』都係潮語，當時好多人講，但家唔會再有人講呢句說話啦。」當年耳熟能詳的潮語，你掛在口邊還是早已忘掉？
惡補潮語
想學習潮語，一點不難，多聽自然明解，明解不是難，明白出處才是困難所在，以下數本讀物，有助你惡補古今潮語。
《次文化語言》$80，彭志銘著，解析香港新舊兩代市井俚語、黑社會語、各行業術語、外來語、方言等潮語俗語來源。
《旺角詞話》$55，彭志銘著，以近一年坊間的熱門流行語如「港女」、「草泥馬」及「河蟹」作引子，邊解釋詞彙典故邊談政論事，是語言和時事評論結合的新品種讀物。
《香港潮語話齋》$55，彭志銘著，解構香港當代新潮語的形成和因由，從而檢視本地歷史文化的異變。
《港式廣府話研究 I及 II》各$60，作者吳昊是香港掌故專家，他梳扒整理大批港式廣東話，推出這本香港俗文化的研究報告，對本土慣常用語進行分析和解讀。
電視電影潮語多
1.歌唱比賽電視節目《聲寶之夜》，參賽者賽後獲零至四分，分數以亮燈顯示，葉麗儀唱歌勁到「爆燈」。
2.《親情》裏周潤發飾演木咀輝，帶出「木咀」一詞。
3.百搭甘草許紹雄演技太一流，但人們只記得「大隻講」這潮語，倒忘了他有份演出《新紮師兄》，更別說這潮語出自他口。
4.《監獄風雲》裏周潤發有不少經典對白，如「隻揪」，對白為：「夠膽就同我除帽出去隻揪！」
5.《網中人》廖偉雄喪吃漢堡包幾乎爆肚一幕太經典，角色名字「阿燦」不但成為當年潮語，到現在人們仍用「阿燦」一名稱呼他。
潮語釋義
打柴：照字面解是拿條柴出來打，實指被上司降職或解作「死掉」。
嗰制：意指是得意、可愛、搞鬼，六七十年代非常流行這用字。
飛仔/女：又作油脂妹/仔、曱甴仔/妹，意指壞分子，終日游手好閒的不良少年。
雷條：即二十元，「二」同音「義」，在黑社會用語裏「義」又叫「雷」，「條」解鈔票。
無厘頭尻：無頭無尾、不知所謂，演變成「無手尾」，其實正字應為「無首尾」。
串：意指招積、囂張，由文化大革命紅衞兵的串連活動演變而來。
帶卡：潮汕方言，形容男女朋友前後腳，好像貨車後面多拖帶一節車卡。
爆燈：意指好厲害，源自於七十年代電視歌唱比賽節目《聲寶之夜》，唱得之人，分數燈牌會亮起來，主持賈思樂用「爆燈」形容得滿分者。
掂過碌蔗：無綫劇集《網中人》發哥常用潮語，意指「很順利」，與蔗本身掂不掂無關。
阿燦：廖偉雄在《網中人》的劇名，角色是新移民，後來成為新移民代名詞，亦有老土、次一等、窮的意思，演變成後來香港人到大陸就成為「港燦」，移民到加拿大就叫「加燦」。
咪當我 Robert：張衞健《老友鬼鬼》一劇常用潮語，意思是「不要以為我是白癡！」
蛇驚：廣府話，正音為蛇驚，原意打草驚蛇，形容蛇很膽小，一嚇即走，俗化後音變為「蛇 gwei」。
大隻講：《新紮師兄》許紹雄演舅父東一角的對白，意指別人講就天下無敵，做就有心無力。
木咀：源自電視劇《親情》周潤發的角色木咀輝，形容別人樣子討厭。
隻揪：《監獄風雲》裏周潤發的對白，「隻」指「一」，「揪」解「打架」，即是一對一對打架，後演變成另一潮語「單挑」。
街訪
Bruce：「小學嗰陣都有聽過同學仔叫人做『大隻講』，咦家無人咁形容啦，多數講『吹水』。」
彩記：「條女『好啃』，即係話條女係豬扮人；仲有『界刂女』，咦家的人會講『抄牌』，以前啲潮語抵食啜核啲。」
No comments:
Post a Comment