MaxC 手記: 代 Cult 1：80後 - 跟潮流紋上癮

■肩上梅花是兩年前生日朋友幫手紋，貫徹她愛花和線條的風格。

以前就話紋身是蠱惑仔專利，但近年明星效應，唔少少男少女、甚至專業人士都會紋番一兩個喺身上留念。而且紋身不再局限指定圖案， 80後紋身潮流是自己設計圖案自己話事，紋身搖身一變成潮流象徵。喂，你今日紋咗未呀？

記者：林佩婷
攝影：伍慶泉、楊錦文

主攻中國書法

■訪問期間在紋身的關小姐話從 facebook口碑找到 Joey，網上讚她細心，一個圖案傾好多次才拍板。

年紀輕輕的 Joey是行內少見的女紋身師，本身學設計、曾做化妝師的她，願望是將 Body Painting變成紋身永留作品，最後決定做一個紋身師，更到泰國、德國、瑞士等地拜師學藝，回港後以中國書法字體風格在紋身界中佔一席位。「本身畫畫都好鍾意柔和線條，去到歐洲啲師傅話中國風喺外國好吃香，呢句話啟發咗我利用中國書法技術去設計圖案，自成一格。」最初字體全由 Joey自己研發，後來索性搵個書法老師教，希望令自己字體設計更進一步。

開店四年， Joey和不少客人建立關係，更在香港打出名堂，但她說其實港人對紋身仍停留在以前的觀念，時至今日仍帶歧視，「喺外國好似新西蘭，紋身有文化傳統、歷史背景，啲人紋身紋到臉上都會有人尊重。但喺香港就有負面形象，好似我當年搵舖，人哋一聽開紋身店就話唔租；好辛苦租到舖，又唔俾你放啲相喺出面，住客又投訴啲相嚇人；甚至連申請銀行卡機都係唔批。」雖然受到白眼，但 Joey一點都沒放棄，最近目標就是希望到歐洲嘗試執業，甚至參加紋身展。

2.第一個試用淡色紋的唐卡，令顏料更貼皮膚，效果相當成功。

3.Joey對自己腿上紋身最滿意，由北京師傅用掃描手法紋出來。

一個紋身一個故事

4.09年全運會 BMX越野賽獲銅牌的 Alex，心口紋上父母和妹妹姓和名。

講起紋身潮流， Joey話 80年代仲好興蠱惑仔圖案，約十年前就吹起荊棘、近年 Old School同日式風，而且圖案都變細咗。無論外邊的風格如何變， Joey說最怕紋身好似倒模咁。「我唔想啲客求求其其揀個圖案就紋上身，當初揀中環開舖都係諗住客源係專業人士，佢哋諗到概念我再幫手設計。我唔想佢哋亂咁紋又後悔，之後要 Cover番仲麻煩。所以每次我都要傾好多次，一個圖分分鐘搞好耐，最長由傾談到完成試過一年半載都有。」正因如此，她每個客人的紋身都有個故事，「好似前排有個女仔搵我幫佢紋梅花，面積由背橫跨至手臂，作品講明用嚟參加比賽，我就幫佢設計咗中國風得嚟又 Modern嘅梅花。亦有次個客為咗紀念媽咪，請我喺背脊紋上爸爸寫的碑文，仲特登寫咗好幾十次，揀到最靚同佢紋。最有意義一次係幫因乳癌切咗乳頭的女士紋身，佢一路講一路喊，紋完後心情反而好咗好多，嗰刻我發現其實紋身唔單止係一種藝術，仲可以幫到人心靈。」

5.為紀念母親而在背上紋上碑文，令 Joey印象難忘。

6.客人要求紋的「男兒有淚不輕彈」。

鏟不走愛的紋身

廿多歲的攝影師阿謙身上只有兩個小小紋身，全和名字有關。「細細個就覺得紋身圖案好靚，終於喺 20歲走去紋，喺網上搵到呢個星好特別少人用，我本身叫 Vincent，星星由好多個 V組成，就一於紋咗佢。好多人話紋身好痛，但我覺得縫針仲痛。」到第二個紋身的故事就說來話長，「四年前剛同女友拍咗一年拖，一齊利用大家個英文名設計咗一款字體，最初女友只想用嚟做 Wallpaper，跟住我話不如紋上身，佢最初話唔好，不過見我紋咗佢又紋。」好景不常，拍咗五年拖最終分手，情人走咗但紋身猶在，其他人見到可能會覺礙眼，謙卻從來無諗過鏟走佢。「當初紋嗰陣無後悔，散咗都無。家個女朋友知道呢件事，最初無咩反應，不過半年後就話睇落有啲眼寃，可惜師傅話當初線條紋得太粗好難改，鏟走可能仲肉酸。」再問第日會否和現任女友來多個愛的紋身，他笑笑口話唔會喇！

■ Jodic話最初想學紋身但無門路，機緣巧合在 Joey店工作拜師成功，現主攻 Dark Side風格。

■以前的公司老細較傳統，怕影響工作所以將紋身收收埋埋。

■這粒星星他上網找了很久，線條靚少人用，而且是由 V字組合而成。

■和舊女友名字合併愛的紋身，他說沒後悔，只是現任女友笑說嫌眼寃。

7.自家設計的骷髏頭，一邊天使一邊魔鬼翅膀，對比強烈。

8.熱愛 Dark Side風格的 Jodic，模仿 H.R.Giger的畫作，希望有日能作紋身圖案。

9.客人要求要超真實的 Poppy Flower， Jodic搵咗好多相先做成，仿真度極高。

10.將人像線條修改，令它看起來像個面具。

紋上骷髏念亡師

■ Dick近排熱愛抽象風，最新想喺頸度紋抽象燕子，正在搵法國紋身師傅幫他設計。

單看 Dick周身紋身周身環，普通人一定會以為他是蠱惑仔或不好惹，其實他本身說話溫吞，性格不慍不火，紋上癮全因覺得靚並唔係諗住威。 16歲開始第一個紋身，從此欲罷不能，身上大大細細約十個紋身，一向沒甚麼編排，風格並不統一。「嗰陣圖案唔係咁多有得揀，有啲衝動紋完後唔滿意，之後就要 Cover番佢。」他說舊時已有兩三個 Cover咗但有些圖案太大覆蓋唔到，對紋身完全無悔的他，最後悔是揀錯圖案。

被人紋得多自然想學，四年前他拜幫他紋身的人做師傅，希望畀多條路自己行。學習時候找朋友做實驗品，最搞笑是功夫未到家，紋到甩晒色要師傅打救。他右手臂的骨頭紋身就是為了懷念第一個師傅。「上年師傅因為吸毒去世，為咗紀念佢，我親自畫個骷髏頭，因為骷髏代表死亡。」

改圖案最滿足

11.右手臂的骷髏頭是用來紀念吸毒去世的第一位紋身師傅。

之後 Dick搵到第二個師傅繼續學，終於在一年前選擇筲箕灣平民化商場開店，貪其租平。現時一個月平均有 15-20個客人，估唔到四成是師奶，「試過有啲太太買完餸拎埋入嚟就話要紋身，大部份都係話要紋蝴蝶，其次係花。更厲害有次個媽咪拖住幾歲大嘅女入嚟都係紋蝴蝶，每到呢個時候，我就會問佢哋係咪諗清楚，因為驚佢哋衝動走入嚟後悔。」他說千萬別看輕師奶，原來她們比年輕人更忍得痛。 Dick笑說曾有兩個後生仔入來紋身，點知一見血就面青青想嘔，好彩最後紋得晒。不過相比幫人紋身，他說幫人修改更有挑戰性。「個客都係因為唔滿意先想改，咁喺有限制情況下幫人改得成，滿足感大過就咁幫人紋。」講到尾， Dick還是想在中環開店。

12+13.熱愛槍的他，在手上和肚上紋上自己設計的槍枝圖案。