減肥妙方

名人兒子身高六呎有餘，但留學美國之後，唔知係唔係食得快餐太多，體重大增，達二百五十磅，暑假回來，名人見到，大吃一驚，急忙帶兒子睇醫生，醫生話一定要快快減肥，否則嚴重影響健康，命都短幾年。

名人周圍打聽，邊度有減肥妙方，打咗幾個電話，個個都話有子女到中文大學減肥，減肥中心有兩度，一在中環，一在威爾斯醫院。名人立即打電話去預約時間求見營養師，得到答覆就係：「最快要到八月中，即三星期之後。」三個星期之後，兒子要返美國預備上課了，如何是好，於是名人問左丁山有無辦法？左丁山不是神仙，唯有講多幾句「鎖你、鎖你、鎖你。」

中大嘅減肥計劃其實係由營養師為減肥人設計餐單，減肥人必須跟到足，每個星期「覆診」，向營養師交下過往七天嘅食物紀錄，由營養師畀意見，並無甚麼主要運動配合，但係真有效果噃。大記者早知道有此「減肥餐單」，身先士卒去試吓，掂！後來肥仔Ｋ得知，亦要參加，唔夠六個月，體重由二百○三磅減到一百七十，腰圍由四十吋減到三十六，但營養師嫌肥仔Ｋ減肥速度太快，叫佢唔使咁心急。肥仔Ｋ嘅餐單認真食而無味，日日每餐水浸菜一份，白飯一碗，牛肉豬肉可食，必須唔加醬汁，飲茶時就叫一碗菜遠肉片米粉（ 麪有油，不宜）、一碟瘦叉燒、一份水浸菜，如魯智深所言，吃得口裏淡出鳥來。肥仔Ｋ又自動去跑圈、游水，故此減肥速度更快。

原來減肥可以慳到錢，減肥前，肥仔Ｋ買一份保險，要填上體重、身高、腰圍，保險公司話佢身材不合標準，要徵收保險附加費幾百美元，嚇咗肥仔Ｋ一跳，你話要每年畀多幾百美元保險費，不如自己減肥，慳番好過。參加減肥計劃之後，在威爾斯醫院碰到幾位同學與朋友，全部都係過肥，營養太好嘅八十後，香港肥仔何其多也。講甚麼纖體代言人吖，原來吃吓無汁無味口淡嘅營養餐都可以掂！

（左丁山）2010年07月31日