MaxC 手記: 代 Cult 2：八十前 - 出位 DJ余迪偉：我敢玩敢認

■余迪偉手拎電動自慰器，使用時會發出藍光，$980。

有文獻記載早在戰國時代已有性用品，奈何香港這國際性大都會性風氣依然保守。保守只是外表，不代表香港人不玩性玩具，余迪偉一語道破：「八十前一族，私底下愛用愛玩，但口不會宣揚出來。」

記者：林佩婷
攝影：王文忠
余迪偉髮型及服裝： Marvin Lin@IFC IL COLPO、 CIRCLRS

棄十姑娘用按摩棒

八十前商台 DJ余迪偉做節目一向敢言，中三已經第一次行性商店，「當年行恆豐中心見到間性玩具店，覺得得意想入去逛逛，身邊班同學抗拒，我咪自己行囉，最搞笑係連售貨員都有少少俾我嚇親。」自此，他對性玩具保持正面觀念，視之為性愛輔助工具， 18歲開始把性玩具當禮物送給朋友，反應熱烈，「講真，一對情侶拍拖兩三年，乜都試過唔悶就奇啦。試過有對情侶，男友要去外國公幹，我提議買支蝴蝶形假陽具畀佢女友頂住檔，女友試用完話：『好 OK，頂得住！』我仲送過假陰道、假肛門、吹氣公仔畀朋友，朋友都話好好玩。其實，好多外表老土嘅人都話唔玩，送畀佢哋閂埋門咪一樣照用？」

20 歲，他開始用按摩棒，好方便空出兩手搜尋其他身體敏感點，「男仔手淫總有一隻手放下面，剩番另一隻手摸乳頭，用按摩棒自動震，就可以空番兩隻手出嚟摸身體其他地方。我朋友每逢聖誕開 Party都送性玩具畀我，曾經生日收過個飛機杯，前面凹落去要自己攪動，生日仲要左攪右攪好嘥力，加上太窄好刮肉，硬係覺得無咁好玩。我又收過手銬同自慰器，亦試過同伴侶玩乳頭夾、綁繩同震盪器，伴侶都 OK接受到，增添到情趣就係 Bonus。」

出書談性事

■於書展推出《筆舉直插》，暢談個人性事，希望大眾開放一點，$62。

兩人拍拖，由拖手、愛撫、接吻到最後正式插入，一切太公式，性玩具是公式過程裏的調劑品，「當然要睇 Partner啱唔啱玩，我鍾意用按摩棒按摩陽具，不過唔知點解通常都係我教人玩，未試過有人主動同我玩。」他不愛玩 SM：「不過卻參加過外國有直有攣嘅 Party，男露陽具女露乳，打晒燈玩 SM，最震撼見到日式綑綁，簡直大開眼界。」每聽到對性玩具的誤解，他會直斥其非：「啲人唔係唔想用，只係唔夠膽買，拎屋企用品代替性玩具，亂插亂玩仲易出事，有護士朋友同我講，年中有唔少男人喺陽具或肛門塞原子筆蓋或電芯，搞到要求醫。我出《筆舉直插》收集故事，都係想大家開放一啲。點解有咁多風化案？部份原因係因為性生活不協調，我聽過個 Case，情侶同居，女友買性玩具玩，男友勁嬲，話女友睇小佢，搞到差啲分手，好低能！性玩具唔一定係假狗，自製 Q-Card大家一齊抽，抽中要做某一種有趣體位，咁都可以叫做性玩具，最緊要係你點去表達，令對方接受到同你一齊玩。」

香港性玩具大王

■藍生：「曾一度想過放棄，好彩有太太鼓勵，先繼續做落去。」

別以為只有日本或歐洲生產商製作性玩具，香港的藍兆文堪稱本地性玩具大王， 1986年開廠房，自己設計的產品超過 1,500款，九成半貨品銷往世界各地，最初他做玩具起家，機緣巧合才涉足性玩具，「當年定單好多，利潤高。嗰陣一般玩具行業競爭大，性玩具競爭小啲，做耐咗索性自己搞埋設計生產，肥水不流別人田。」當年整個社會對性玩具帶負面觀念，拍檔一年後退股，公司即陷低潮，幸得太太幫手，更從女性角度設計不少女性用產品。「太太做開家庭主婦乜都唔識， Partner退股後佢幫手睇廠，後嚟開始設計產品。以前按摩棒得象牙色，佢設計出光面按摩棒，仲有 12隻色，我以為無人買，將設計草圖隨手掉入 File櫃，點知個客見到，拎番出嚟研究兼落單，一出反應好到不得了，有啲客甚至每隻色買一款，最好賣係紫色。」

報道說是他創作吹氣娃娃 Mary，其實類似娃娃早於 1986年前已出現市場，並非他獨創，「我都唔知點解香港人咁鍾意叫佢做 Mary！」他開廠設計的新款吹氣公仔，每個都有不同名字，如肥娃娃 Betty，「 2000年有人問我有無肥公仔，當時覺得好怪，唔要靚女要肥婆？跟住即刻搵攝影公司幫手，照肥女 Model身形製作 Betty，一出賣到斷市。」成功例子多，失敗品也不少，「做過一隻會呻吟嘅公仔，入碟會發聲，初頭諗會好賣得，我搵英國朋友太太幫手錄音，點知完全唔賣得，最後搵到原因，因為好多人玩吹氣公仔都唔想人知。」

■ 2008年澳門性用品展，他對這張十多萬的性愛床感興趣，買了一張放 Office。

■今年 8月於中山開設旗艦店，進一步開拓國內市場。

■會議室擺滿公司產品，同事周不時買新產品來創新思維。

為工作自卑

■工廠工人全為媽媽級，做了 6年的陳女士（右）和 15年的李女士：「最初都有少少怕醜 o架。」

每年出產的貨品不計其數，他說：「歐洲人比較鍾意真實影像，香港人唔使太像真。」現時客戶六成是女性，幾十年來最好賣的，是條像真度高甚有質感的假陽具，「按摩器無乜點變，最多係由大變細，以前 9吋長直徑 2吋，咦家縮小方便攜帶放入手袋。最萬變不離其宗嘅當然係假陽具， 6吋半始終最好賣，當然時代進步，物料變得更安全，質感更像真。」一躍成為性用品生產商龍頭，但多年來他都對自己職業感到自卑：「覺得好醜，我特登印兩款卡片派畀人。」直至六年半前，兒子藍奕邦勸他參加心靈課程，才得到解放。「美國導師叫我自己行出去宣洩，突然問成班同學：『你哋了唔了解父母？知唔知佢哋用乜姿勢做愛？』嗰刻突然醒覺性係私人事，人唔敢講，但每個人都需要，唔使閃閃縮縮。」問將來目標，他定得更遠大：「希望將來中國同香港同胞，買性用品唔覺羞愧，普及程度去到超市、便利店都有得賣。」

■新研發的 Love Machine，造型趣致。

■氣墊床也很受歡迎。

■迷你按摩棒，有紋無紋尖頭突頭，可放在手袋隨時待用。

■太太首支創作的光面陽具，有 12隻色，當中紫色最搶手。

■這支質感十足的電動陽具，是數十年來最好賣之一。

吹氣娃娃各有命名，只不過坊間叫慣 Mary，藍生話沒所謂，故這裏全以 Mary統稱之──

■ 1986年第一代 Mary，只得半邊臉立體和超大 O嘴表情為其特徵。

■手腳可動，面相美觀，摸落更有真實感。

■夏日炎炎，故公司推出最新設計的動漫臉容水泡。

■最新推出的動漫娃娃，符合電車男幻想。

■為照顧歐美用家，除白人外還有黑人，啱晒唔同口味的用家。

■ 06年開始不斷推出制服系列，包括海盜、護士及 Party Look，至啱鍾意玩制服誘惑的人。

鍾情歐洲貨

■性玩具不一定是假狗和震蛋，情趣倒模廚房用品也是性用品一種，$88。

開業十年的「 Loveshop」老闆 Eric說：「八十前消費能力高啲，知道自己需要啲乜，多數買以實用為主嘅歐洲貨，當中又以按摩棒最受歡迎。」他說曾經有上年紀的女士來請教：「佢哋問男友對性無興趣點算，我推介增加性能力產品，又或買催情香水試試提高性趣。」