偷得浮生數日閒，限於時間，去歐洲就唔得 o架嘞，去美國已失興趣，見到上飛機搜身啲麻煩嘢，已經冇晒胃口啦。於是只剩番亞洲城市四個選擇，東京、大阪還是星加坡、曼谷？計吓數，日圓、坡紙升值，機票難求，酒店房租貴，抵唔抵呀？問吓旅遊 L，佢話十年前住星加坡五星酒店，日租三百（坡紙），現時日租一千，貴到佢肉痛。日租咁貴，皆因賭場開幕，環球片場啟業，大大吸引各地遊客到星加坡一遊，其威力遠勝香港之世界真細小小小嘅迪士尼。不過呢啲係宣傳之功勞啫噃，旅遊 L嘅朋友一家大小，齊遊星加坡環球片場，失望而回，朋友講，星加坡環球片場仲細過香港迪士尼喎，根本難與加州環球片場相比。
旅遊 L話：「如果你唔怕，都係去番你最熟悉嘅曼谷最抵玩，機票易搵，商場減價，按摩買一送一去邊度搵！」旅遊 L之言有理，於是一二三就到咗曼谷，住在四季酒店內寫稿。呢間酒店，住到慣 o架嘞，早已留下不少腳毛，記得早年甚少港客入住，多數碰到歐美人士與日本客，但今時唔同往日，港客大晒，早上食自助早餐時，一半食客講廣東話，同是香港人；於是醒起酒店發展嘅大師級人物 Adriaan Zecha，曾對左丁山講過：「我做酒店，一定要做最頂級，經濟好時，可收最高房租，經濟低迷，旅遊慘情時，我有資格大減價，搶走其他酒店嘅客，不致晚晚擺空城計！」
曼谷四季前身係曼谷麗晶，再前身係曼谷半島。 Zecha一手策劃，買走曼谷半島改為曼谷麗晶，因經營得好，享譽一時，可惜後來麗晶因種種理由而賣盤，麗晶品牌消失，客人不無遺憾，譬如香港 Inter-Con，入到去總係覺得與以前嘅麗晶相比，失去些少光華。一次坐的士話去洲際酒店，司機竟然呆咗幾秒先至答：「即係去麗晶呀？」可見香港麗晶之深入民心。曼谷四季唔係唔好，但與昔日曼谷麗晶相比較，又總係差少少啫！
（左丁山）2010年08月01日
No comments:
Post a Comment