七、八十年代港姐選舉是盛事，人人趕回家看直播，港姐地位高得可與港督出席活動。有謂近年港姐水準每下愈況，越選越扒，但王賢誌卻力撐：「港姐選得出，就一定有代表性。」
記者：林佩婷
攝影：譚盈傑
王賢誌：我係港姐擁躉！
■ Vinci：「好在有慧妍雅集，靈魂人物如朱玲玲、趙雅芝會帶住批新港姐，令港姐越來越有修養氣質。」
找王賢誌（ Vinci）談港姐，以為他會借機踩兩腳？他說自己一向與 TVB無仇，自小已是港姐忠實觀眾，「七十年代我仲好細個，記憶有啲模糊，記得張瑪莉、朱玲玲、鄭文雅，佢哋端莊大方，唔止靚咁簡單，最有印象係 1976年冠軍林良蕙，無諗過佢會咁癲，奪冠可以喊成咁。」八十年代傳媒報道更多，他更留心去看，「幾乎個個佳麗都令人留下印象，楊寶玲同李嘉欣嗰兩屆，連落選港姐都好高質素。對我嚟講，港姐係最重要電視節目，當年錄影機未普及，錯過咗無得睇番，初賽後要等一個禮拜先到總決賽，緊張刺激！」
自 2000年起，媒體及娛樂活動多不勝數，觀眾多了選擇，女孩子多了途徑踏上明星路，選美地位有參差，「咦家女仔可以參加歌唱比賽、做 o靚模或者做 Model出位，唔一定要參加選美。以前啲冠軍，一見就覺得好靚，近年港姐則質素比較平均，要選美過後出鏡多番啲，你先會慢慢覺得佢哋靚；咦家 Cut初賽直接入準決賽定勝負，時間短咗，更加要畀時間大家熟識佢哋。今年冠軍俾人話豬扒，我睇過相，唔可以用醜去形容，選得出一個冠軍一定有原因，同操行學識都有關，好似陳茵媺、陳倩揚，選嗰陣都有人唔認同，咦家表現進步，證明當日選佢哋係有原因。」
相比以前，近年的港姐選舉比較多負面新聞，全因傳媒在無風起浪， Vinci：「以前夠有傳邱淑貞整容、羅佩芝虛報年齡啦，咦家傳媒一定要搵嘢寫，最簡單就係寫不和、鬥批踭，感情好啲又話人哋係 Les，再唔係就話人整容。至於造馬，我自己做過亞姐司儀，爸爸又做過華裔小姐評判，據我所知唔會囉，講真當年啲評判唔係政府高官就係立法局議員，咁多知名人士，會唔會同 TVB一齊做戲呀？」這幾屆港姐吸引力下降了很多，冠亞季知名度不高，感覺封后後參與公益事務也比以前少， Vinci：「可能同少咗好多親善訪問同停止參加國際性選美有關，其實想提高港姐知名度，可以改善投票制度，俾更多觀眾參與投票，就更有震撼力，如果可以擴大投票人數，觀眾就會睇得更投入，咦家比賽人數咁少，可以考慮只選冠軍，冠軍集中參與所有公益事務，增加曝光率。」
謝寧：玩票性質參選！
謝寧
1985年港姐冠軍謝寧出身音樂家庭，本想當音樂家，一個機緣巧合跑去選美。「當時媽咪有個學生做化妝品公司，叫我參選順手推廣牌子當宣傳，由集訓到當選我都抱玩票心態，根本無諗過會攞冠軍，司儀叫我名嗰刻，我仲問隔籬係咪叫我，行出去連位都走錯，之後順理成章入呢行，嗰陣諗法好單純，同家啲人參選志在必得嘅心態好唔同。」
近年港姐屢被批評無樣貌無氣質，謝寧替她們說好話：「其實咦家港姐質素更高，幾乎個個都係大學生、碩士，又生得高大，當年無乜大型節目或者選美活動，選得出嚟自然人人認得，咦家太多傳媒渲染，女仔爭出位，先令大家覺得唔夠矜貴，加上入行路多咗，選美唔再係少女夢想，選美又驚俾記者爆料，自然少人參加。」至於選美活動越辦越差勁，她認為與 TVB沒關係，由一件頭到三點式，統統都是社會有此需求電視才會提供，「最大問題反而係評判，以前啲評判有社會地位同年紀，有番咁上下人生經歷先識睇靚樣以外嘅嘢，先有分析同評價能力。今年評判太年輕，廿幾歲 o靚妹、演員識睇唔識分析，自己都未識講嘢，點批評人？」
1973年 孫泳恩
1974年 張文瑛
1975年 張瑪莉
1976年 林良蕙
1977年 朱玲玲
1978年 陳文玉
1979年 鄭文雅
1980年 戴月娥
1981年 勞錦嫦
1982年 梁韻蕊
1983年 楊雪儀
1984年 高麗虹
1985年 謝寧
1986年 李美珊
1987年 楊寶玲
1988年 李嘉欣
1989年 陳法蓉
1990年 袁詠儀
梁小冰：選美是個夢！
提到 1990年港姐季軍梁小冰，很多人仍記得她跌帽擺 Pose解窘一幕，最後憑機智晉身三甲。她承認自己是港姐迷：「細個同家姐會拎定紙筆扮評判貼邊個贏，連媽咪都話港姐好正面，講笑話過我哋三姐妹將來都要選美，嗰個年代，選港姐對每個女仔嚟講都係一個夢，跌帽嗰刻我聽到噓聲，音樂又就快播完，我順勢坐低擺 Pose，跟住勁多掌聲，返到後台係咁震，當時個個佳麗都衝埋嚟攬住我話我實得，之後我淡定晒，覺得自己有機會。」
今屆港姐冠軍被評豬扒、季軍被評花師奶，當晚也是座上客的她說：「個個都靚，自己亦貼中冠軍，今次我有份同佢哋親身接觸，綵排嗰陣大家無化妝，我都覺得唔差，冠軍個樣好甜皮膚好靚。新一代港姐要 EQ高，因為潮流文化唔同咗，傳媒一定要搵嘢講，所以惡意批評唔使理，要對自己有信心，港姐代表性一定有，即使咦家咁多唔同選美，但無一個可以替代得到港姐。」
梁小冰
朱玲玲
發展有高低
港姐三甲或落選佳麗不乏出色成就，除踏上明星路，也有人向不同領域發展。當然，亦有部份人星運平平，最後要靠脫出位。
1. 1979年殿軍鍾楚紅踏入影圈，拍過不少經典電影如《秋天的童話》，現傳隱居巴黎。
2. 1982年落選的翁美玲，憑甜美外貌成當家花旦，其扮演的角色黃蓉更是經典中的經典，惜後為情自殺。
3. 1990年冠軍袁詠儀，憑《新不了情》與《金枝玉葉》兩奪影后。
4. 1983年亞軍張曼玉，在影圈大放異彩，成為柏林影后。
5. 1987年因整容傳聞退出的邱淑貞，拍攝《赤裸羔羊》後奠定性感女神地位。
6. 1988年冠軍李嘉欣嫁入豪門。
7. 1998年落選的林雅詩，是真正投入三級片的港姐級女星。
8. 1998年落選的呂麗君，消失一陣子後搖身一變成為大劉女友，還誕下一女。
街訪：
訪問五個八十前街坊，四個說朱玲玲是最美麗港姐，難得她在 1977奪冠， 23年後的今天，她依然明艷照人。
陳小姐：「朱玲玲至靚，近年嗰啲嚇死人，完全無印象。」
蘇先生：「除李嘉欣之外，我其他港姐無乜印象。」
林小姐：「我選李嘉欣，咦家啲港姐無代表性。」
吳小姐：「首選朱玲玲，咦家啲港姐好悶蛋。」
李小姐：「都係揀朱玲玲，今屆我都係為咗睇祖藍，先睇港姐。」
No comments:
Post a Comment