今時今日，除傳銷、剝衫做口靚模或書展動漫節等短期租約，還有甚麼暑期工？求財，最低工資不打算保障做暑期工的學生哥；求工作經驗，誰會慷慨傾囊相授？求人不如求己，與其任人剝削，不如諗計創業。 Old-school如賣舊書、潮如自製 iPhone apps，一樣能殺出新血路。
記者：蔡慧敏
攝影：周旭文
Models：sansu & christy @ puremodels
舊書變銀紙
對窮家孩子來說，做暑期工當然不為「吸取人生經驗」。
城大副學士學生黃錦輝，小五小六時已開始幫茶餐廳派傳單：「大部份人都派得好 Hea，但我會針對目標顧客， Sell多兩句：『好好味喎，試吓啦。』」人工不算太高，但時薪$20對小學生來說已很和味，不過他現時已經不想再打工，「我想自己控制成件事。」 2006年暑假，他開始買賣二手教科書，到去年終於轉虧為盈，蝕足三年仍堅持到底，真係書中自有黃金屋？「二手教科書真係好好賺，我中三嗰陣喺舊書店賣書兩星期，已經夠買一部單車。」學生哥，可觸及的人際網不外乎是同學，除了賣閃卡，買賣教科書實在理所當然。「趁後生創業成本細，咦家輸 10萬，好過將來輸 100萬！」他說以前賣書只為賺錢，現時還為了粉飾 CV：「我聽投資銀行啲高層講過，鍾意請有創業經驗嘅年輕人，因為細細個就識諗、肯搏！」為將來累積資本也是目標之一，「我讀完 Degree都廿五六歲，到時出嚟打工都嫌老啦。」聽得我一陣心寒。
賣舊書者眾，不見得人人成功。阿輝說最重要是有發大來搞的心態，「只做朋友生意唔夠食，只做一區陀地又煩，所以我一開始就諗住做全香港生意。」至今他已在觀塘、荔枝角、天水圍等地開了共 6間分店，但「全港化」主要靠網上收定單、跨區送貨。自命 Think Big的人不會沒主見：「好多人會反對你創業，但唔好理佢哋。」家人反對，因為不想舊書滿屋，面皮夠厚就總有人願意教路，只有把電話簿管理好。之前，他因不懂選擇舖位慘遭滑鐵盧，寧願蝕按金斬纜。中學時，他參加了為商科而設的 Mentorship program，認識了錶廠老闆，不厭其煩向人請教：「人哋見你係細路，總願意教你，本來呢個計劃不為理科生而設，但我求學校讓我參加。」
■年年暑期工招聘會，墟冚過搶包山。
■最低工資可沒暑期工份兒， o靚模、書展、職業 Fans是現在的暑期工新貴。
自創增值服務
■黃錦輝年紀小小已經滿腹經綸，嚇親大人！
現時他對尋找短期舖位、講價、爭取免租期等已有相當經驗，他的店又有很多增值服務，例如建立客戶資料庫、針對過往的買賣記錄通知他們有合適新貨；在 facebook送現金券做宣傳；介紹新客可有回佣等，都是從各行各業借來的推銷手法：「問題係點樣執行。」阿輝現時每晚都要回覆網上定單，睡得很少，主修電腦又去聽管理的課。勤力、親力親為等「阿媽係女人」的硬道理，又是知易行難。
我們來到觀塘分店拍攝，叫店內的妹妹拿一叠書過來，她呆了一呆，指着攝影師鏡頭說：「我對相機都好有興趣。」這樣的員工很難搞，學生哥沒理由跟你賣命，惟有軟硬兼施。負責庶務的員工有底薪，打破行規，沒有按流程辦事的員工要罰錢。老闆經常兇細路，但食飯埋單也是老闆義務，好多書店爛尾都是因為員工「落格」，賬目分明自能減低誘惑。阿輝強調要把經驗推廣至其他業務：「這些 SOP（ Standard Operating Procedure）其他人抄咗都做唔到。」
有蘋果 人人做老闆
■ apps保留了自畫棋子的土炮特色。
iPhone 4一出群情洶湧， i字頭的一切都有市有價。地鐵車廂人人都埋首於超低能的 apps，但香港活躍的軟件開發者來來去去都只有 20幾個，過去三年開發了六個收費軟件、發了幾十萬小財的理工大學電子計算系講師雷兆恒（ Simon）說：「做 apps developer先要掌握 Java、 C+、 objective C等軟件和電腦語言，入行的門檻較高。」但開發 iPhone apps不外乎手作仔一種，除時間與心機，成本近乎零，而且產品推出後，便會有人持續塞錢入你袋。「 Apple偉大之處係產品放上 App Store就掂，唔使搞 Marketing，亦唔似其他電子遊戲般要顧及平台，人人都可以做老闆。」每賣出一個 apps， Apple會與開發者三七分賬， Simon最初開始 apps副業時還沒有太多前人經驗可參考，一切都要自己摸索。現時 iTune上已有免費教材， O'reilly亦出大量工具書，研究成功，肯定好過打暑期工！
■介面其實可以設計得再 Raw一點。
■雙打版！一人一頭齊齊玩也真夠低能。
無聊 vs 實用
■網上有不少 developer stories，大家不妨睇睇他們成功之道。
賣得火熱的 apps大致可分為兩類：極實用和極無聊。以 Simon開發的第一個的 apps《港鐵路線》為例，就是覷準大機構轉身慢，推出半年便賣了 3萬幾個，雖然在港鐵推出免費版本後便無以為繼，但他說：「兩年來都 Keep住有錢收，幾開心！」不枉當初花了半年時間。《天下太平》則針對本土情懷，更無聊的《 soundmitate》玩扮食鬼、貓叫、狗吠的聲音有幾似：「大家都係想輕鬆吓啫。」
以為互聯網無遠弗屆，其實 apps的市場仍是山寨王當道。「只要熟悉本地宣傳網絡例如 facebook、討論區，喺香港一定賣得好。」本身玩開音樂的他也寫了兩件樂器遊戲，還罕有地成功衝出維港：「原來日本都無《三味線》 apps，兩年來，《小提琴》喺意大利都有幾萬個客。」音樂是國際語言嘛。他現在仍有教小朋友拉小提琴，兩份暑期工分別何在？「教琴定性好多，心中有個譜，寫 apps每日都有新鮮事。」會否全職做 apps developer？「唔會啦，睇唔到幾年後市場會變成點，可能到時 iPhone都消失埋，做 Part time玩吓咪幾開心。」
■雷兆恒的「寫作」技能，就在 palm時代開始累積。
■介面簡單，玩法卻似足日本樂器三味線。
No comments:
Post a Comment