八月二十三日農曆七月十四，正是鬼節燒衣之日，通勝曰：「忌栽種，遠行，除服。」唉吔，忌遠行，真係撞鬼，港人同哭。早上九至十一時係凶時，殺手門多薩，或者譯做「掹刀殺」，就在十點鐘左右強行登上康泰旅遊巴士，「掹刀殺」卒之在晚上開槍，八名香港遊客當場死亡。
死者之中，有一位梁太，一家五口快快樂去菲律賓旅行，點知回程之日就碰上凶煞，丈夫梁錦榮與兩名女兒死亡，兒子重傷留醫，情況令人擔心。梁生係港大工業工程系（一九七七）畢業生，曾任中小型企業聯合會會董及副會長，在觀塘開電子公司，商界有好多人識得佢。又有咁啱嘅，秘書Ｖ與家人在家睇直播，佢家姐認出梁太係佢嘅「梅真尼」舊同事，急忙打電話搵其他舊同事求證，大家都話「係呀」，不禁悲從中來，如感同身受，為梁太之不幸流下眼淚。上一次有朋友睇電視睇得咁驚恐，相信就係九一一之夜，當日保險Ｋ見到飛機撞正世界貿易中心，就係撞正佢嘅公司總部辦公室，嚇到魂魄不齊，而森哥兩位公子在世貿及世貿隔籬辦公，為之面青口唇白，十幾小時後始打得通紐約電話，知道兩子無恙，先至勉強瞓得着。
二十四日晚到馬會幸運閣食晚飯，成班人都覺得我哋住在香港，叫做幸運，設想生於長於菲律賓，對住一班平時識收錢，臨事慌張，雞手鴨腳嘅警察，如何是好？幾位在座老友都話家中菲傭痛罵菲律賓警察最叻就係蝦蝦霸霸小商戶、街販與窮人，捉賊就唔使預佢哋。在座有李一哥，我哋問佢對菲警有何評語，佢話無以置評，但佢自己睇電視就睇到行唔安，坐唔樂，好想熄電視了事，估唔到菲警竟然連最基本嘅警察招式都駛唔出嚟，如果係香港特警，就完全唔係呢回事。
大家本來坐埋傾其他事務，但是八二三馬尼拉殺人事件，實在太大，不吐不快。唔講唔得，幾乎偏離正題。左丁山如常提早鬆人，坐的士打道回府，唔抵得，再打電話問一位退休人士，點解菲警會咁水皮 o架？佢話多年前菲警曾經希望港警提供反綁架訓練，港方考慮後，婉拒之，理由不明。左丁山就明嘅，以前聽一位來自新加坡嘅國際保安公司總監講過，菲律賓時時點指兵兵，點指賊賊……
（左丁山）2010年08月27日
No comments:
Post a Comment