望子成龍，望女成鳳，這一代的阿爸阿媽，不是期望仔女做律師醫生，便是金融才俊，賺至盤滿缽滿。但 23歲小伙子司徒子聰，拿着會計學位卻跑去做推車小販雪糕仔，可能在不少父母心目中認為無前途加無「錢」途，但他說：「我覺得呢一行有得發圍喎！」講真有多少人明白這位 80後的雪糕夢？
記者：葉雪芯
攝影：梁細權
家人大力反對
■自小喜歡食雪糕，訪問當日，一啖一啖雪糕無離過手。
司徒子聰，今年 23歲，去年成功抽中販賣冰凍甜點牌照，今年 1月 28日正式開檔，成為全港最後生的雪糕仔。港專會計學位畢業，做過財務管理工作，又做過保險，最終辭工決定入行在街邊賣雪糕，家人當初大力反對他做雪糕仔，「其實我畢業後出嚟做過其他工作，人工萬幾蚊，都幾穩定，但當時我已經知道自己坐唔定，我想轉行。咁啱當時我屋企人去申請冰凍甜點牌照，佢哋叫我填多一份表，咁我咪試吓囉，好幸運我抽得中。到我決心去做，屋企又叫我唔好做，所以我都有啲唔明白。但我自己真係好有興趣，我打算發圍 o架！」
拆件睇!
■生財工具三輪單車，用了三萬多元特別訂做。
■除了賣飲料，仲兼賣珍寶珠，他說：「我唔怕佢告我喎，最多咪好似朱仲華咁，俾佢哋罰一百蚊囉。」
■打風落雨照擺街，為免被雨淋，要撐起幾把大大的太陽傘。不過大熱天時，在馬路邊，都幾焗！
■三輪單車沒有電，所以要賣冰凍飲料，就要自己買冰和手提冰箱。
最霉月入一百蚊
由於沒有三輪電單車牌，司徒子聰用萬多元訂做了一架三輪單車，每日由上環踩車到中環環球大廈對出干諾道中擺檔，打風落雨，即使黑雨都照開檔，「我聽過雪糕仔老前輩話，個太陽係專登整蠱我哋 o架，你越係唔開檔，個太陽就越唔出嚟。所以點都要出來擺一陣，咁啲街坊街里先有印象知道呢個位有個雪糕檔吖嘛！」
與其他雪糕仔一樣，司徒子聰不時受到食環署人員驅趕，「我無俾佢哋發過告票，不過就經常俾佢哋告我阻街，趕我去到街口個天橋底，但係天橋底生意好差呢，根本就無人睇到個檔口，擺足一個月，都只係得一百蚊收入。」由於是單車，沒有辦法到雪糕廠買貨，要靠廠方送貨，「十點前一定要開到檔，等住廠方貨車送貨嚟。」食環署唔止話佢阻街，更有不清楚條例的食環署前線人員特意刁難他，「阿 Sir話我個牌係賣冰凍甜點，所以我唔可以賣水喎！」與朱仲華一樣，入行前同樣到工聯會上堂，熟知牌照條例，絕對夠膽同食環署抗爭，亦同樣受到不少傳媒訪問，他說工會與傳媒幫到手，「自從出過鏡之後，食環署啲職員都對我哋好好多，唔會亂咁告我哋。」
■擺正喺環球大廈對出，中環港鐵站出面，司徒子聰話這個位生意最好，周末好多菲傭客仔。
■曾經試過俾食環署驅趕至畢打街街口，收入大減，一個月只得一百大元。
參加食雪糕賽學嘢
在街邊做「雪糕仔」，人人都覺得是夕陽行業，但司徒子聰就有另一個睇法，「你哋覺得係夕陽行業，係因為政府唔再發牌，搞到呢行好似式微咗咁。但老一輩始終會退休，只要政府再發牌，呢一行就總會有得繼續做。」他口中所講的「發圍」，其實就是引入其他雪糕牌子，一來可以吸引中環 OL客，二來可以令自己的雪糕檔更有特色。早前他就特別參加屯門市廣場的速食雪糕比賽，順便試食新到港的北海道雪糕兼做 Research，「試過有客人問我，點解唔試吓入其他牌子雪糕？咁我都有諗過，其實咦家賣緊嘅廠方雪糕，市面上已經飽和，賣吓其他新牌子雪糕，客人先會覺得特別。我去銅鑼灣日本超市食過呢個牌子，都幾多人買，想試吓賣，咪決定參加食雪糕比賽，鋪路為拎貨囉！」他的牌照須於 11月前續牌，他說如果傾得成這次「生意」，到時或者有可能轉賣其他牌子雪糕。
■為了入新貨，千里迢迢去到屯門市廣場睇貨揀雪糕，做定 Research。
■早前參加屯門市廣場速食雪糕比賽，目的為試新牌子雪糕，兼為入貨鋪橋搭路。
夢想兒女齊看檔
■司徒子聰女朋友（右）瞓身支持，特別辭去工作，日日同佢一齊開檔。
司徒子聰說，難得抽中雪糕仔牌，機會難得，一定要把握時機。家人甚至旁人可能不認同，但他的女朋友就一定認同，「我女朋友同我一齊辭工幫我開檔，佢好支持我，又唔怕辛苦。」兩小口子，將來要成家立室，單靠微薄收入，如何支撐？「將來未諗到，或者到時佢出去搵工。但我哋有時都會憧憬，小朋友放咗學落嚟爸爸檔口幫手，一邊看檔一邊做功課，就好似我哋細個嗰時，咁都幾好呀！」
街坊都支持
Hayz：見佢一個後生仔都幾辛苦，間中都會嚟幫襯佢。
阿花：我覺得雪糕仔呢個生意有得做呀，不過後生仔做呢行就辛苦啲，人人周末有得去玩，佢哋就要開檔。
胡先生：行行出狀元，賣雪糕係辛苦少少，但難得 80後有理想又有實踐，我支持佢呀！
No comments:
Post a Comment