中文大學去年成立生物醫學學院（ School of Biomedical Sciences），屬醫學院，由臨床前（ Pre-Clinical）嘅解剖系、生物化學（醫藥）系、藥物系、生理系合併而成，由陳偉儀講座教授擔任院長，陳教授係中大聯合書院化學系一九七四年畢業生，留美多年，二○○九年應聘回校主管生物醫學院。
新學院成立後一年，話咁快就得到維他奶創辦人後人捐款一億五千萬元，建設「羅桂祥綜合生物醫學大樓」，並於九月一日下午五時舉行奠基禮，主禮人除沈祖堯校長外，仲有周一嶽、李國章、羅桂祥基金主席羅德承博士（ Peter T S Lo）、維他奶國際集團有限公司執行主席羅友禮等，一位大學校長（不是沈校長）對左丁山講：「中大籌款確係有啲辦法。」羅桂祥基金捐呢筆錢，並非全部用嚟起樓，有一大部份係用來支持農作物研究嘅，例如黃豆。
富豪捐錢俾大學，大學多數以學院、大樓，或講座命名回敬。八月二十日睇到一位專欄作家如此寫來：「歐美一些億萬富翁……捐款作長期醫藥研究，不計較出名於一時……不一定要求在醫院招牌冠以自己的名字。捐獻目的就是捐獻，不求有甚麼別的效果。香港富豪就截然不同了……」
外國富豪捐錢之後，不求冠名？唔好開玩笑，只不過香港人講英文名人名字就特別順眼順口，讀中國人名字就覺得條氣唔順之嘛，無怪陶傑對英文特別推崇！ Stanford， John Harvard， Elihu Yale， Ephraim Williams係美國嘅富翁，捐款成立大學直情以佢哋嘅姓氏為名，於是才有哈佛大學、耶魯大學、史丹福大學、威廉斯學院等，因此後人先至記得佢地名字，醫學院喎，美國以捐款人名字冠名，更加多，例如頂尖大學芝加哥嘅醫學院叫做 Pritzker School of Medicine，長春藤大學康奈爾大學嘅醫學院叫做 Weill Medical College，牛津大學商學院叫做 Said Business School，劍橋大學商學院叫就 Judge Business School，歐美富豪捐款命名之風，比香港流行得多，我地唔好不求甚解。
（左丁山）2010年08月29日
No comments:
Post a Comment