八月二十一日《蘋果》報導日本貼中文標語，抗議中國遊客如廁陋習，甚麼標語呢？一個例子就是保持文明，保持清潔（請不要把生理用品扔在便池裏！）咦，好普通啫噃，中國人廁所，到處都是標語，在香港嘅公廁呀，公司廁所呀，大廈商場廁所呀，見到慣啦，例如最簡單嘅就係：「如廁後，請洗手」。幼稚園教學生，會教小便後，要洗手，何解到咗成年人嘅廁所，仲要貼上呢個標語？比較幽默啲嘅，例如曾在中華總商會俱樂部廁所見過：「行前一小步，文明一大步。」最初不明所以，後來諗清楚，為之莞爾。大抵到私人會所或者富豪飯堂吃飯者，年紀唔會太細，年紀大之人小便就有一大毛病，唔怪得福臨門個男廁小便盆採用長形直身式，老人家用之，都會幾文明。活力先生講起一句打油詩：「舊時小便射過街，今日痾尿滴濕鞋」，就係男性長者之寫照，故此一啲廁所貼標語，請男性行前一小步。如果仍然冇法呢，就要向梁智鴻先生請教或求救咯。
論廁所清潔，亞洲地方之中，日本無出其右，大抵冇一個國家研究廁所設備有日本人咁好心機嘅，只有日本先至會有公司、酒店、百貨公司嘅廁所會使用發熱廁板及自動噴水，令到我地港燦好唔慣，亦未必識得使用。照計用咁複雜嘅廁所，成本應該貴好多，要打落貨品或服務價錢度，轉嫁畀消費者。呢啲廁所點解只在日本流行，其他地方唔用呢？一啲流行文化研究學者，或者可以為此寫篇長文。
昔日與前市政局主席梁定邦去旅行，邦主身攜儍瓜機，唔係同我地影相噃，而係去到所有廁所都影相（當然係趁無人之際），搜集人地廁所嘅資料，回港研究，改善市政局管理嘅公廁。話時話，今天香港公廁十分整潔，有專人打掃，供應埋抹手紙、廁紙，實在非常文明，邦主於此有一份功勞，邊度會有其他市政局主席對廁所咁關心嘅啫。在廁所貼標語起碼有警醒作用，某日行過上環馬路，見到天橋上中文寫住「吸毒好有型，膀胱細三成」，都唔知佢講乜，非常缺乏生動創意。倒不如在所有酒吧廁所內貼上：「索Ｋ好冇味，不舉似遊刑，媾女無效用，痾尿逐滴清」，用嚟嚇吓啲大男孩唔好索Ｋ！
（左丁山）2010年08月30日
No comments:
Post a Comment