馬尼拉之憶

星期一中午，扭開 now電視，想話睇股市新聞，點知畫面播出嘅，竟然係馬尼拉發生前警察劫持香港康泰旅行社嘅畫面，為之嚇咗一驚，乜咁大件事？暑假將盡，香港遊客陸續返港，點估得到菲律賓旅行會成為一個過氣警察嘅人質，我哋香港人從未親身碰上過呢啲意外，睇電影就見得多，人在巴士內，能夠保持鎮定已經好難得。

轉過去 BBC，畫面係馬尼拉，但女記者就人在曼谷，相信係睇住電視畫面作報導，應該係事出突然，女記者趕唔切去馬尼拉作現場直播。

菲律賓曾經一度係香港人嘅旅遊熱點，退休賓架Ｅ年青時就幾乎個個周末飛往馬尼拉，一來航程短（個零鐘頭就到），二來價錢便宜，三來有好多玩樂地方，但馬可斯下台之後，當地治安每下愈況，打劫事件不絕，加上綁架勒索事件特多，令遊客望而卻步，前財政司郭柏偉爵士嘅兒子就係在 Boracay島被劫殺嘅，令本港外國人大為震驚，本地人更加唔敢去，於是菲律賓旅遊事業一落千丈，由領先泰國變成大大落後。左丁山在銀行工作時期，銀行嘅亞洲訓練設施集中於馬尼拉，取其租金廉宜與及英語通行之故，所以左丁山曾係馬尼拉常客，時時去上堂受訓。後來轉工，負責地區性業務，亦時時到馬尼拉拜訪客戶，直至到馬可斯垮台，環境大亂，一次住在 Forbes Park外籍銀行總經理嘅大屋，晚上一齊出去吃晚飯，見司機帶手槍，再放兩支自動步槍入車尾箱，嚇到面青，外籍老總受過軍訓，笑左丁山：「香港人成世未見過槍？」真係未見過噃，之後唔敢再去菲律賓咯，點知十幾年前俾老闆派咗做馬尼拉一間酒店嘅總裁，位於著名紅燈區 Mabini，久唔久就要過去開會，開完會最多住一晚就急急鬆人，唔敢出外行街。

睇電視直播到晚上九點半，越睇越火滾，到咗八點零，開始心情沉重，驚住慘劇即將發生。馬尼拉警察似係業餘人士，用大鎚劈巴士，毛手毛腳，在全世界電視鏡頭前出醜。悲慘者，呢場 reality show（真人騷）嘅受害人竟然係我哋香港人。

（左丁山）2010年08月25日