八達通洩露私人資料一事，鬧得滿城風雨，私隱好似係好大件事，陳碧鏵總裁犯上大罪，人人得以罵之。不過咁，大家不必陳義過高，以為私隱神聖，政府訂立法例保護我地，實則現實啲睇，我地日日上網，就已經日日洩漏私隱，大阿哥日日睇住晒，無所遁形。
做得最明顯嘅大阿哥當然係中國，老早已迫令雅虎透露資料，跟住要谷歌合作，而號稱世界上保護傳送資料最嚴密嘅黑莓，母公司 RIM為咗中國市場，早已投降，在中國設立伺服器，即使普通黑客截取唔到黑莓嘅加密資料傳送，中國政府必要時，根本可以檢視 RIM設於中國，為中國顧客而設嘅伺服器，乜嘢私隱秘密，盡皆可得。印度呢，亦聲稱為咗國家安全理由，對 RIM講：「你地既可答允中國要求，做乜唔在印度有樣學樣？」中東阿聯酋禁止黑莓傳送資料，最後目的亦係一樣，就係逼使 RIM為咗市場（銀紙），容許國家政府隨時入侵個人私隱。美國政府為咗反恐，從來唔尊重個人私隱。事實上，政府官員只要取得法庭文件，就可以秘密監察黑莓電郵，故此美國政府大力批評阿聯酋嘅做法，實在笑死人。
歐盟推薦使用 HTC與 iPhone，排擠黑莓，主因為前兩者容易俾政府或黑客入侵。各國政府基本上好討厭保安嚴密嘅私人系統，當然把口就話要立例保障平民百姓嘅私隱啦。《華爾街日報》報導一間叫做〔 X+1〕嘅網站專門在網上搜集、偵查及解讀個人私隱，幫客戶分析個人資料，其範圍及厲害處犀利過八達通出售資料幾百倍。呢間〔 X+1〕機構從一位人士嘅上網習慣就可以推論到呢位人士年薪約五萬美元，到沃爾瑪超市購物，租兒童影帶等等情況，雖則未必十試十靈，但準確程度足令客戶傾心。
好似左丁山呢類用 iPhone上網嘅人士，話唔定所有個人資料已被遠在萬里之外嘅〔 X+1〕掌握晒，投訴無門。我地一旦自願使用手機、上網、信用卡，基本上已放棄咗私隱，留下無數電子腳印，俾〔 X+1〕呢類公司追蹤，至於八達通呢啲私隱洩漏，有錯係令人激氣，但在世界舞台上，濕碎到極。
（左丁山）2010年08月08日
No comments:
Post a Comment