泰國股市

雖說泰國旅遊局認為泰國旅遊不景，最近發生在市中心爆炸案，一死九傷，令好多國家維持旅遊泰國警告，令好多遊客望而卻步，特別係歐洲客到泰國之旺季，係每年十月至次年一月，現在已是接訂單時節，但接單不如理想，頗令酒店及旅遊巴士業擔心。故此泰國旅遊局預測，全面旅遊復甦，要待明年夏季，如果曼谷緊急狀態令早啲撤銷，旅遊業復甦可以早啲。

曼谷以外省份（泰國叫做府）已陸續撤銷緊急狀態令，點解曼谷還要維持？無他者，搞事分子，不論是何幫派，都希望在首都搗亂，以引起民眾及國際注意，在北部緬甸邊境發生爆炸案喎，曼谷政府邊會理吖。雖然話處於緊急狀態，曼谷生活如常，大塞車情況不變， Siam Paragon遊人依然蜂擁，對平民嚟講，政治只係政客與軍人之間嘅鬥爭，與佢地無干，哪個總理在朝，人民還不是照樣納稅，照樣行賄與貪污！

上半年泰國有紅衫軍示威作亂，政府無情鎮壓，好多外國人嚇怕咗，但泰國上半年出口同比增長 46.1%，股市上升逾八成，表現好過香港恒生指數與美國杜瓊斯指數多多聲。出口勁升係因為泰國農產品有價，雖有大旱影響收成，但價錢因天旱而推高。股市方面，泰國積弱已久，現在泰國股市指數八百五十幾點，比起「冬蔭功金融風暴」前之歷史高點一千七百幾點，只剩番一半，但其他國家早已創咗新高，超逾九七啦。兩位僑居泰國之中大經濟系校友對左丁山講：「外國基金追落後，認為泰國股票相對便宜，今年上半年來泰國炒一浸，下半年要步步為營。」

泰國股市係一個小池塘，有外國錢嚟炒一浸，已足以令一啲股票起死回生。同學炒家Ｓ炒足泰股二十年，曾經輸到一無所有，幸好家姐借佢二千萬銖，頂多五年，呢晚請佢到 InterContinental嘅中菜廳夏宮金殿（ Summer Palace）吃晚飯，炒家Ｓ笑呵呵咁話：「今年頭幾個月已經還番一半俾家姐，就快鬆晒綁。」但願如此，既然咁開心，大家都唔介意夏宮金殿之菜式差勁（除咗清蒸筍殼魚之外）。炒家Ｓ話揸車送我地去華欣玩一日，左丁山話千祈唔好，炒股要緊，勸炒家Ｓ千祈唔好一時分心，失咗沽售機會！炒股時時要記住：花開堪折直須折，莫待無花空折枝。

（左丁山）2010年08月05日