曼谷按摩

在曼谷街頭，到處係熟食攤檔，晚上尤其成行成市，唔知使唔使攞牌呢？如果香港有此情況，食環署一定忙個不休，到處掃蕩。呢晚聽人講，話曼谷水門區（ Phetchaburi Road一帶）有一間著名海南雞飯店，應該一試。於是坐上的士前往，本來由四季酒店過去，路程甚短，但一過四面佛十字路口就塞車，司機立即轉右，走咗入橫巷，經過日前發生爆炸案現場── Big C門口巴士站，路上黑媽媽，心裏為之一驚。不旋踵，的士衝出一條黑巷，在 Phetchaburi Road前停低，講一聲： Soi 30就停低。

一落車，見到馬路對面滿是食檔，以為海南雞飯就在前面，但路上汽車頗多，車速又快，過唔到馬路噃，唯有向左行多幾步睇清楚先。點知真係行咗幾步就見一間飯店內坐滿人客，十幾個侍應忙個不休，咦，得來全不費功夫，就係嗰間海南雞飯飯店嘞，每碟售價三十五銖（港元八個零），抵食吖，咁多泰國人幫襯，冇錯嘞啩。

但聞名不如見面，呢間名氣大，生意好嘅海南雞飯食肆，招牌產品只係一般啫，食過就算，以後不必再光顧。唔似得吉隆坡唐人街嗰間「南香」 Nam Heong，可以一去再去。食完飯，過咗馬路，有一間大廈叫做 Metropolis，佔地甚廣，打橫打直都有一條街咁長，但全部被小販攤檔團團包圍，大廈裏面嘅商舖，生意俾街邊小販搶晒，大廈業主點收到好租金呀。

香港人好鍾意到曼谷搵按摩，最緊要平夾靚。 Pratunam Centre旁邊一條街，叫做 Ratchaprarop Road就有好多街舖係按摩及足部按摩店，夥計在門外兜生意，收費夠晒便宜，不過睇見就驚驚哋，夠唔夠 衞生 o架？曼谷按摩，真係豐儉由人，四季酒店 Spa收五千銖，九十分鐘，有一間 Centre Point，收二千五百銖，足三個小時，而且買一送一，又有一位女遊客到素坤逸路 Emporium附近搵到一間，收六百銖一小時，女士話：「好好啫，按摩使乜畀咁多錢？」

（左丁山）2010年08月04日