八月份係放假季節，法國人在八月份根本懶得返工，有辦法嘅巴黎人紛紛離城，到法國南部或者出國去也，今年適逢歐洲各國要削減財赤，政府大削開支，勒緊肚皮，於是一啲領導人如英國卡梅倫，德國默克爾，法國薩爾科齊，西班牙薩比迪羅等等，紛紛留國消費，在國內旅遊景點放假就算，不敢外遊。
歐洲人過往夠巴閉啫，廿一世紀就係我哋亞洲有錢人嘅世界，亞洲人到歐洲使錢，中國人到法國意大利買名牌，中東人到英國買起 Harrods，在百貨店外違例泊車，罰款照畀，幾威風呀，難怪近日睇雷鼎鳴教授嘅大塊文章，佢引述一位內地學者所講：「歐洲人沒了勢頭」！以後世界經濟只得兩個火車頭，就係美國與亞洲，亞洲之中，中國 GDP總量壓倒日本成為世界第二強，另外印度人多勢眾，從後力追，淨係睇中日印三國，未計中東石油國，歐洲已經儍了眼。
但係有錢還有錢，亂咁投資形同敗家，計清楚好啲喎。英國傳媒報導一位四十七歲香港人（生於廣州）黃健華，可能收購利物浦球會喎，真定假呀，僑福黃健華我哋就識，佢係支持蔡約翰嘅大馬主，旗下馬匹以「陽明ＸＸ」，「陽明ＹＹ」為名，馬迷好熟悉，但係 QSL體育聯盟嘅黃健華（ Kenneth Huang）就缺乏知名度嘞，究竟佢點樣發達，發到要買入利物浦，而且已投資 NBA球隊克里夫蘭騎士隊，大家木宰羊。佢發達前投資點樣叻，無從瞭解，但有錢之後買入騎士隊 15%股權，就似乎做咗儍仔噃，騎士隊得一粒超級巨星，就係勒邦占士，占士走咗去目前最乞美國球迷憎恨嘅邁亞密熱火隊之後，騎士隊完全冇晒吸引力，電視台對之失去興趣，球會嘅 Franchise Value大跌，黃先生呢筆投資肯定沉落水面以下，如果真係買入利物浦，呢隊波今年入唔到歐冠盃，收益大跌，來季能否進入四強，還要過曼城、熱刺、維拉三關，前路維艱，黃生唔係楊生，唔會甘心買入另一隊伯明翰呀？如果黃生入主利物浦之後，效法曼城大灑金錢買球星，我哋香港阿燦就大開眼界，睇吓中國人搵錢幾咁容易。
（左丁山）2010年08月06日
No comments:
Post a Comment