iPad做了這一代人的出奇蛋，聽歌、睇片、打機、上網、 check email……一次過滿足你四五六七八個願望。不過講到最厲害又最令愛閱讀者開心的，正是可以一次過放幾千幾萬本書於一身，令電子書、 E雜誌熱潮「嘭」一聲湧過來，咁到底仲會唔會有人行書店？
記者：葉雪芯
攝影：楊錦文
Model： Kitty@Puremodels
電子閱讀器
■經典書籍如《阿 Q正傳》、《孫子兵法》、《三國演義》等，由於沒有版權問題，到網上書店下載價錢甚平，大約幾蚊美金而已可以下載全套，極受歡迎。
跟大家說說歷史：電子書不是新鮮事，全球最大的電子書店 amazon.com現時至少有 63萬本電子書供顧客選購，早在 2007年已推出了電子書閱讀器 Kindle，之後有全美最大書店 Barnes& Noble自家研發推出的電子閱讀器 Nook接力。這幾年電子閱讀在香港始終不成氣候，但近日將這風氣重新推高的，絕對要歸功今年上場的 iPad。 A4尺碼，薄薄機身，閒閒哋入幾千本書不成問題，花費一個幾毫隨時下載報刊 App，一機幾用，開波即賣個滿堂紅。或者你還嫌 iPad好賣只是一件潮流玩物，但論閱讀，事實又不能睇小它的影響力，首先是嚇得對手 Kindle馬上由每部售價$2,000劈價至$1,500，就連今年書展都另闢一角專門讓人下載讀物，而不少出版商、書商更落力推銷電子刊物，大時代即將來臨。
■亞馬遜推出的 Kindle算是市場上首部流行的電子閱讀器，惜未帶起電子書閱讀風潮， iPad一出 Kindle如臨大敵隨即劈價。
■ Kindle無疑令許多漸入窮途的出版商開了竅，全美最大書店 B＆Ｎ接力推出的 Nook，身上有不少 Kindle影子，不過在香港就無乜人聽過。
免費 App吸引我閱讀
■ Curtis最愛到 iBook買電腦雜誌，《 Macworld》更加是每期必買。
有傳媒人說過，愛睇小說、文字創作的人始終會買實體書，但 iPad的出現，首當其衝受歡迎的反而是雜誌報刊。手握 iPad的 Curtis十分認同，「好多人上網買 App睇電子雜誌啦！香港雜誌好多都係講潮流消費或者新資訊，簡單直接為主，快速瀏覽過就得。一本雜誌喺書報攤都要十幾廿蚊，買個 App只係幾毫子至一蚊美金，而且有唔少日本雜誌仲係免費 App，雖然只得十幾頁試睇，但足夠我過手癮！講緊係幾百個 App喎，每本睇十幾頁都夠我睇幾年！」 Curtis說，方便又着數的免費 App，反而令他睇多了書，「咦家乜書都睇，唔使錢，下載了唔啱睇都無關痛癢。如果有合心水雜誌，我畀錢期期下載佢個 App又何妨？」現時他看的主要是香港和美國電腦雜誌。
■樂天網站有不少日本電子雜誌，大部份都是 free App， Curtis說試睇十幾頁都夠過手癮。
iPad fit晒漫畫迷
Francis自認是 MAC迷，同樣也是漫畫迷，但自從有了 iPad，家中的漫畫就被他一併丟掉，「你問鍾意睇書嘅人，其實佢哋最鍾意儲書。我以前買好多漫畫，尤其鍾意睇港漫，雖然薄薄一本，但儲到一屋都係。香港地，地方好大咩！無位擺之餘，儲埋一幢幢書仲搞到好多書蟲。有部 iPad之後，我丟晒啲書， scan晒之後入番落 iPad，一部機儲晒幾百本漫畫，幾爽！咦家得閒就會下載漫畫 App，仲使乜行落街搵書報攤買漫畫睇？」愛買愛儲，不一定愛睇， Francis坦言以前有些漫畫買返來未必有睇，但現在一機在手，未睇的現在反而重拾舊夢睇番晒，仲大讚畫面質素好過實體書，「實在太方便，上車睇幾頁，好易消磨時間。而且用 iPad睇漫畫認真一流，個『書度』完全 fit晒睇漫畫！另一樣抵讚，係畫面仲靚過睇印刷，顏色好突出，乜嘢刀光劍影完全活靈活現，如果遲啲會出埋片同埋聲音，你話幾正！呢方面 iPad做到啦。」
■除了睇港漫， Francis亦會看外國的科技雜誌，最近美國老牌科技雜誌《 WIRED》推出了 iPad版供人下載，他說除了文字內容，最勁可以用 iPad睇埋 3D、短片等，這都是傳統版本看不到的。
■ Francis說用 iPad睇港漫，最正是顏色和 size都做得好出色。
我們就是 internet世代
■帶動了電子閱讀，功不可沒的還有 Wi-Fi的流行，畀一個月費，人人拎住一個流動的 Wi-Fi接收器，去到邊都可以上網睇書。
同樣用 iPad睇書、又會上 Apple Store的 iBook買書的 Mason和 AK，雖然都認同電子閱讀勢成風氣，但他們說傳統的實體閱讀始終不會死，「我哋呢一代就是 internet世代，但人口會老化嘛，老人家依然係好多，仲係有一群人係好鍾意去酒樓邊飲茶邊揭報紙雜誌，睇住個 mon對眼又唔好，如果真係拎住睇白紙黑字，的確係舒服啲。雜誌喺 iPad呢個平台係行得通，以後可能電子書會取代印刷，但書就未必可以完全取代。因為咦家啲人買書唔係為內容，有時可能係有其他目的，例如買寫真係為咗周秀娜個簽名，訂雜誌為咗贈品，太多書嘅周邊合作產品，令到大家去買書。如果個個都去買 App或者去 iBook下載，對於書商來講咪少咗個機會同其他牌子 crossover賺錢囉，所以書係繼續會做得住！」
■ Mason多數會去 iBook下載機械工程的書，甚至會將幾千頁的書 scan好再放入薄薄的 iPad，以後都不用再拎住本超重硬皮書周街走。
■有人說電子閱讀沒有了實體書逐頁揭的感覺，但其實 iPad一樣做到，「用手指逐頁揭咪一樣囉！」
未來衝擊教育界
電子書捧場客 Gary喜歡下載免費 App，其中本地電子雜誌《 my appazine》他期期都看，他覺得電子閱讀不單止衝擊報刊雜誌界，可能連教育界都有好大衝擊，「以後可能教科書都可以全部靠一部 iPad搞掂，上堂到交功課統統用 iPad同 internet做晒，學生唔使再揹重重書包。我眼見好多細路咦家都唔會再拎一本本玩具書出街，有好多又益智有教育意義又免費的 App可以下載，父母都唔使再買嗰類玩具書，小朋友拎住個 iPad手指指、篤篤吓，會發聲又會有動畫睇，邊玩邊學，畫面又靚，更加吸引佢哋去學習。不過可能呢個趨勢會行得慢啲，家長都會驚小朋友拎住部 iPad唔係睇書咁簡單，仲會玩其他娛樂，而且香港人版權意識唔強，全部將閱讀電子化仲會有好多翻版問題。但長遠來講，電子閱讀係一定 o架喇。」
■ AK都愛看本地電子雜誌《 my appazine》，但他則認為傳統媒體依然有它的生存空間。
■ Gary是 iPad迷，同樣是追星族，他說有時可以舉高 iPad做閃牌。
■小朋友都不會再拎住一本本益智的玩具書出去玩，個個一邊篤 mon一邊認生字。
No comments:
Post a Comment