地產Ｗ打電話嚟鬧左丁山儍儍地，為咗壓抑樓價、地價，居然夠膽提議撤銷聯繫滙率，提升利率，地產Ｔ話：「撤銷聯繫滙率，有乜差池嘅話，邊個負責？」負責？梗係拍板嘅人物啦，關我地啲小市民乜事。有資格拍板嘅就係曾特首、曾財爺、陳總裁、陳局長等人在香港決議，上呈北京國務院，最後由溫總理、胡主席等人 OK先至得。但係要提上議程，北京報批，這需要好大勇氣，故此地產Ｗ話左丁山係儍嘅。
他報計算過，月入一萬三千二百元，如按揭利率等於一厘，負擔得起二百零五萬嘅樓（首期三成，供二十年），利率五厘，供得起樓價一百四十三萬元；可見利率一旦上升，就會壓抑需求，令樓價難以狂升。地產 W話：「利率上升，又有人大駡政府，話供樓供唔起嘅啫！」
左又鬧，右又鬧，如何解決？地產 W講：「現在好多議員要求重建居屋，民主黨、民建聯以至工商界嘅經濟動力都贊成，加上行政會議召集人振英哥大力鼓吹，話不要任由下一代的住屋質素倒退，香港不可以見到里約熱內盧、墨西哥城、新德里和孟買的簡陋房屋、尼龍帳篷。一副悲天憫人之貌，話明改善住屋情況不能單靠市場，言下之意，就係要政府出手，興建居屋啦。既然曾特首腹背受壓力，不如咁嘞，在十月嘅施政報告，大膽宣佈，將擱置好耐嘅八萬五政策重新推動，政黨與振英哥一定拍手叫好，曾特首民望彈升！」
聽見八萬五就打冷震，想當年，左丁山有份支持八萬五，認為係一項惠民政策，記得民主黨亦贊成吖，點知推出之後，遇上金融風暴，香港衰足七年，董先生唯有中途暗中叫停，民意要求政府救市托市，於是有孫九招之出現，有勾地表之設，又適逢全世界利率下調，樓價順勢復甦，上升以至狂升，呢勻風水輪流轉，輪到市民要求壓市抑樓價嘞，既然上次八萬五係推跌樓市嘅罪人，今次有冇同樣威力，成為樓市功臣？
如果雙劍合璧就一定得喎，曾特首有真勇氣順應民意嘅話，一於就在十月宣佈同時推出八萬五與港元脫鈎！
（左丁山）2010年08月28日
No comments:
Post a Comment