峇里島

峇里島最近發生瘋狗症，死者數十人，二○○二年又曾發生過恐怖襲擊事件，不少人記憶猶新，故此有唔少朋友雖然嚮往峇里島明媚風光（特別係老人家，聽潘秀瓊唱峇里島，幾冧呀），都未必敢去。記者Ｇ年少膽大，冇心理包袱，放假就係去峇里島，發覺地方平靜，街上不見流浪狗，海灘沙滑水清，海風徐來，濕度不高，睡在海灘太陽傘下，都唔知幾舒服，好過香港多多聲。返到嚟之後，佢對左丁山講：「啲外電報導，未必可以盡信，峇里島好好呀，值得一行。只係有一件事，幾乎破壞晒。」佢講出嚟，左丁山唔會笑，因為幾十年來，何曾變過？

記者Ｇ眼見有老人（華人）在機場排隊過移民關卡，輪到長者佢之時，護照內唔見有張離境申報卡（ departure card），關員就話：「唔可以出境噃？」大家啲英文都係半桶水，講唔掂，長者唔知點好，令到記者Ｇ佢哋排在後面乾等，幾乎企到腳軟，有位年青人好聰明，走埋去幫老人家傳話：「 Can you help?」關員立即面帶笑容：「 Yes! Yes!」於是搞掂，如何打動關員助人之心，請自己諗吓。

印尼股市今年上升 21%，跑贏金磚四國股市，跑贏香港，左丁山叫記者Ｇ不妨留意吓印尼股票，但佢話：「唔，見過上述事情之後，幾擔心印尼公司嘅管治。都係咪喇！」記者Ｇ唔制啫，鄧普頓嘅光頭主席麥樸思博士就話對印尼投資抱積極態度，大基金投資着重宏觀層面，唔睇小事枝節嘅。

顧問Ｍ又自倫敦回來，原來一早走咗去參加兒子大學畢業禮，跟住玩咗一輪，返到嚟，見到報紙講特區政府向區議會推銷骨灰龕，飽受反對，不禁對煲呔生出同情之心。顧問Ｍ話：「我在倫敦與朋友傾起，知道倫敦市內墳場已經爆滿，埋葬死者成為大問題，市政府唯有改例廢除永久墓地，已在墳場埋葬七十五年或以上嘅，一律要起骨遷移，以便騰出空穴畀廿一世紀死者，搬去邊？到郊外囉，倫敦寸金尺土，地皮有價，與香港相同，面對墓地不足之頭痛問題亦一樣，雙方應該交流吓！」古語有云死無葬身之地，係痛駡仇人/敵人之言，但在今日，就係敍述事實啫！

（左丁山）2010年08月13日