三代印銀紙

人到曼谷，自然要拜訪一啲朋友及前輩。一位曾經照顧過左丁山太太嘅前輩夫婦，已經八十多歲，仍然健在，打電話傾談，就佢親自聽電話，聲音雄壯，於是那敢怠慢，買下一枝 Royal Salute二十一年，一條 Jim Thompson領巾，一盒四季酒店招牌出品蛋糕，就跳上的士前往吞武里，登門拜訪。

老人家之花園正在大興土木，興建園內第三間屋，給孫女出嫁之用。孫女廿六歲咯，跟隨母親入讀朱拉隆功大學藥劑系，現在與母親一樣，做緊藥劑師，年底出嫁，但八十後買唔起新屋，所以阿公索性在花園起多一間兩層高木屋，三代住在園內，阿公阿婆一間，阿爸阿媽一間，自己兩口子一間，好不幸福。泰國非專業畢業生，月薪約一萬銖，一個一房單位，約四百平方呎在吞武里（ Thonburi）旺盛區域，要賣二百三十萬銖（約港紙一千四百元一呎），八十後嘅年青夫婦都唔知積蓄多少年先至買得起噃。

在發展中國家，讀到大學就有機會脫離貧窮，一般中學畢業生好難走出困境。前輩夫婦係純種泰國人，本是農民之後，但兩人在大戰後考入朱拉隆功，成為少數分子，咁就得咗。老人家後來在泰國銀行做工程師，負責印銀紙，事有湊巧，佢位二女婿自朱拉畢業，又係在泰國銀行做現鈔印刷部，已經退休，未來孫女婿呢，自朱拉畢業，入咗泰國銀行，竟然又係入咗現鈔印刷部門，一家有三代人都係從事泰國銀紙印刷工作，何其巧合也？另一位孫女在朱拉醫科畢業，在醫院做實習醫生，上司醫生正是二阿姨（東京大學博士，血液專家），點解佢地個個讀書咁叻？追番真正原因，源頭就係老前輩一代努力向上，開咗一口井，家人有水飲之故。

老人家最愛吸煙，飲威士忌，打橋牌與飲咖啡。不過年幾前個肺有事，急忙入院施手術，自言執番條命，立即戒掉六十幾年吸煙習慣，連咖啡都戒埋，佢話唔食煙，飲咖啡冇味道喎！見老人家如此精神，請佢地三代八人到位於吞武里嗰邊嘅半島酒店飲茶，想不到酒店中菜廳（湄江）之粵式點心極有水準，於是大家吃得開心之極！

（左丁山）2010年08月03日