泰國旅遊業不景，遊客人數下降，令酒店業經營困難，各大酒店唯有將房租減價，吸引遊客。在咁嘅情況下，位於市中心嘅五星酒店，一旦加入減價行列，就特別有吸引力，好似四季酒店，就成為香港客熱門之選，買國泰航空旅遊套餐（酒店加機票）之中，四季酒店最快滿座，就正如 Zecha先生以前計算之內。呢日左丁山正在四季吃早餐之際，馬主 N來電：「喂，練馬師 T與練馬師 N兩夫婦四人已在曼谷，你不如搵佢地傾吓隻新馬！」
又有咁啱嘅，打電話搵到練馬師 T，問佢住在邊間酒店，原來係四季隔籬嘅 Courtyard Marriott（隔半條街），點解唔住四季？哦， CX套餐之中嘅四季冇法子訂得到，唯有退而求其次！既然住得咁近，不如相約吃餐晚飯，左丁山作主，就去咗 Zanotti，一行人食到飽一飽，兩位練馬師及佢地太太係第一次到 Zanotti，吃到搖頭擺腦，讚不絕口，但又即刻憂愁：「下次我地兩個人嚟，怎麼辦？食完咁正熱 麪包，吃過頭盤，已經飽咯喎，兩個人點樣食得晒一客 parma ham cheese pizza？」呢樣的確係大問題，幾個人叫幾樣嘢，分開嚟食，已經幾乎食唔晒，兩個人的確唔知食乜嘢好！
曼谷繁忙時間，塞車驚人，從四季去 Zanotti，晚上十時後，乘車七分鐘可達，但在六時半呢，我地坐的士坐足四十五分鐘，的士在路上行不得也哥哥，非身處其境，不能置信，司機冇晒符。日間時候，左丁山乘的士，又係塞到面無人色，司機識講幾句英文，呻到樹葉都落，一時八卦心起，問佢支持紅衫定係黃衫？司機話：「我支持有飯俾我食嘅衫，我地泰國人早已認為做官不貪，天誅地滅，邊個上場，照貪無誤，以前嗰位好貪，但我地有工做，有飯食，幾 happy！現在呢個政權一樣咁貪，但我地人民冇工做，冇飯食，個心又唔 happy！其他唔講嘞。」今年上半年，泰國酒店入住率平均係 51%，比去年同期好咗兩個百分點，本來唔錯，但紅衫軍示威之後，加上最近嘅爆炸案令下半年酒店訂房率下滑，都唔知幾時至會復甦，酒店只會裁員，唔敢請人，難怪不少曼谷人感覺難以 happy！
（左丁山）2010年08月02日
No comments:
Post a Comment