（左）陳曙輝：亞洲星光大道第三屆參賽者
（右）李昊嘉：亞洲星光大道第一屆第七名
以前歌唱比賽，一鋪定生死。現在唱歌比賽如《超級巨聲》及《亞洲星光大道》一改作風，一場比賽鬥足半年，星光一班李昊嘉和三班陳曙輝，異口同聲話現時賽制更好，用歌曲表達自己之餘，更可讓觀眾看到自己成長！
記者：林佩婷
攝影：伍慶泉、部份相片由受訪者提供
《巨聲》失敗《星光》贏獎
■她說看到第三屆師徒賽，但自己更鍾意最初玩法，因為有師傅幫手執參賽者缺點，觀眾未必咁清楚每人最初特質。
五歲偶而經過琴行聽到悅耳琴聲，從而踏上學琴學音樂之路，小學時更愛上唱歌玩合唱團，中一開始參加歌唱比賽至今，獲獎無數。李昊嘉（ Sharon）指輸咗唔緊要，因為有更大收穫。「一路都當玩嘅心態，覺得自己年輕，輸咗仲有大把時間去唱。而且比賽好睇到唔同人特質，可以吸收好多嘢。做人千祈唔可以俾個獎蒙蔽，輸都唔使灰心，因為有更大進步空間。」
《亞洲星光大道》第一首自選歌《 Vincent》技驚四座，評判讚不絕口。《電燈膽》一曲更被譽為唱得好過原唱，更有「海豚音」、「靚聲女王」等稱號。但戰績彪炳的她之前曾參加《超級巨聲》百強不入，兩台成績反差， Sharon亦表現得好淡然。「喺無綫百強不入梗係有少少失望，不過揀唔中無得講，可能對方覺得自己唔係嗰杯茶。根本參加亞視呢邊同樣當玩，覺得以後備身份入到 24強已係奇蹟。嗰刻即係屋企大叫，因為一個比賽咁多人參加，入到已 OK。」
長途賽見證轉變
■自細學鋼琴，達演奏級及皇家八級樂理，她說比賽後要不斷進修鋼琴技巧，免生疏。
最初 Sharon參加比賽目的好單純，無諗過被網友起底，甚至第一集評判竟然不是評歌而是評人。周國豐叫佢減肥， Walter Ma更話佢有大笨象腳，之後亦有指靚聲但唱歌欠感情，種種批評她都虛心接受。「最初俾人話肥都呆晒，估佢唔到，咁呢句後來變成推動力，令我努力 Keep Fit食少啲嘢。至於感情可能仲未好掌握到點處理，但張偉文老師有次話聽我唱歌想像到畫面，就覺得自己唱歌都有感情。亦有評判指咬字唔多準，所以特登搵老師教 Speech Level Singing執字粒。」
■到韓國參加亞洲青少年無伴奏歌唱比賽得 Champion and Best Vocal。
她最大的心願只是不要跌入淘汰區唱到最後，然後在八強中進入失敗區，一向平常心的她覺得很驚。「第一次喺淘汰邊緣好驚，行到呢度先衰唔抵。」以前唱歌比賽一鋪定生死，這次比賽時間長達幾個月，壓力好像更大，但 Sharon說更愛參加長途賽。「以前比賽可能要即場揀歌嚟唱、輸贏都無評語，家唱完每次清楚知道自己優缺點、揀歌時間好充足。最重要我個人慢熱，熟悉舞台後反而無咁大壓力，最重要係大家可以見到我哋從純樸到真正成長轉變。至於其他參賽者建立友誼後，似朋友多過競爭對手，勝負自然無睇得咁重，就可以更加平常心。」
■ 07年副學位學生歌唱比賽亞軍。
■不停參加歌唱及鋼琴比賽，目的想令自己更加進步，這是香港教育學院 2009歌唱比賽得冠軍。
1. 比賽後多了很多歌迷，還成立歌迷會，即使到海外比賽也會到場支持。
2. 曾邀請歌唱老師作結他伴奏，演唱那英《夢一場》作「地獄悲歌」參賽。
3. 比賽後獲得演唱會機會，更能一嘗出碟，擁有自己歌曲《萬歲師表》，十分難得。
4. 除了出碟，一眾得獎者亦有出書《星光一班》，$78。
5. 每次比賽後聽評判講完都要諗辦法改善，希望自己有更大進步。
6. 她說將參賽者視為朋友多過競爭對手，當中和何詠詩最 Friend。
7. 現時仍時常和歌迷聚會，幾個月前一齊開生日派對。
冠軍跌低再參賽
■中五時參加學校歌唱比賽拎到人生第一個獎，他一直珍而重之。
星光三班只開始了幾個星期已被譽為實力超凡，當中的陳曙輝（ Rex）的參賽背景好濃厚。 14歲開始參加社區歌唱比賽， 21歲簽約小型唱片公司，三年後錄碟派台時臨門撻 Q；最為人認識是曾奪得 2008英皇新秀歌唱大賽冠軍，誰知半年後公司指未夠默契、資源不足、出唔到碟而解約，經歷人生最低點。他亦坦言過往經歷令其對參加歌唱比賽存有陰影。
直到前陣子無綫搵 Rex上《超級巨聲》踢館，佢當玩上去參加，自認唱得不好的他對輸掉也作意料中事。「之後開始留意兩台的歌唱比賽，覺得自己現在事業方面都叫 OK，但得到了物質享受卻未必比以前參賽的日子開心。最後我搵到一個理由，就係唔可以就咁丟低前十年嘅嘢！終於明白自己究竟想要咩，原來係希望透過唱歌搵番自己，最後決定參加《亞洲星光大道》。」
可能是最後一役
■ Rex說這次可能是人生中最後的歌唱比賽，所以每次揀歌都希望能表現自己最真實一面。
這次參賽跟他以前想 Show Off心態不同，以前揀歌要勁多假音，現在選歌是為了表達自己當下感受。「我本身有信仰，以前唔敢揀驚評判唔鍾意，但呢次可能係我人生中最後的比賽，我想揀自己鍾意唱嘅歌，例如揀咗《信者得愛》表達信仰。」可能長時間空白， Rex首次表演超生硬無信心，肥媽仲話佢似行刑咁。經過幾次上台，明顯得到改善，他說超感激師徒制中的周國豐。「佢真係每次比賽完後會 Send三百字 SMS俾你講番我的唔同問題，仲同我做咗好多心理輔導，令我無咁緊張。」
前車可鑑， Rex現時無諗過辭工，邊參賽邊返工雖然辛苦，但他覺得自己超鍾意唱歌，點辛苦都值得。親身經歷《星光大道》洗禮，他說鍾意長途比賽多點：「家可以俾人睇到自己的多方面，好多諗法都想表達俾人知。長途賽是每次出場都有唔同心態，可以揀自己鍾意嘅歌表達，唔似以前專揀高難度歌去比賽。我覺得只要從歌曲表達到自己，就可以跑得更遠。」
8. 21-24歲簽約唱片公司但無收入，要到商場自彈自唱解決生活問題。
9. 得到 08英皇新秀歌唱大賽冠軍未夠半年就解約，令他對唱歌完全失去自信。
10. 參加《星光大道》初期超無信心，現在越戰越勇，他說每個參賽者都是他的競爭對手。
11. 第一張碟有派歌上台和拍 MV，可惜最後都是胎死腹中。
12. 簽首間唱片公司時有去 Yo Park和 Band夾歌表演。
13. 英皇時期演過《我愛萬人迷》舞台劇，飾演其中一個角色。
14. 年少時和一班朋友一齊學唱歌（右一），當時識的陳偉霆（左三）今時今日已是英皇歌手。
No comments:
Post a Comment