馬尼拉劫殺香港遊客事件，係我地睇過嘅最恐怖真人騷。過往我地睇電視新聞報導印度孟買酒店大爆炸，峇里島自殺式襲擊，巴基斯坦恐怖襲擊，伊拉克、墨西哥等地嘅每日殺人事件，好似係事不關己，當作睇電影，但今次係我地香港人受到侵襲，並且在電視機前睇住十一小時嘅事件發展，直至慘劇收場為止。如果係電影，應係兒童不宜，但呢啲係真人真事在實時發生嘅故事，全香港都睇到實晒，連無綫電視晚上黃金時間嘅賺錢節目都要讓路俾新聞部做直播，兒童與家長在晚飯時間睇電視，日後心理會受到甚麼影響，要問過專家至知道。
電視機前，我地感到無奈、無能、憤怒、傷心、心痛。何解一個國家竟會淪落至如此低效能、低效率，對人質（非菲人）生命漠不關心，直情係冷漠嘅水平。此事在黎剎公園附近發生，黎剎（ Jose Rizal 1861-1896）係讀書天才，菲律賓革命烈士，如在天上有靈，對民族後人如此窩囊，能不羞愧？兇手選擇在此搭順風車，強行登上康泰旅遊巴士，係早有預謀嘅，黎剎公園係遊客必到之地，在此「騎劫」旅遊巴，實有一次中。點解要向遊客下手？係認為咁先至會吸引國際傳媒注意，逼使菲律賓政府還佢一個「公道」吖嘛！
殺手門多薩（ Rolando Mendoza）在大學攻讀犯罪學，任警察三十年，由巡警升到高級督察，獲獎十七次，一九八六年當選十大警察，兒子與弟弟都係警察，可以講係警察世家，呢次為咗被申訴專員（ Ombudsman）撤職，受刺激而殺人。呢類故事，全世界都有，美國就發生過不知多少次被炒僱員持槍殺同僚事件。但令人激死嘅，係菲律賓警察似乎完全唔識點樣解決問題，入夜前掉以輕心，拖拉時間，七點後巴士司機逃出巴士，亂咁放風話車上人士全部死晒（ everyone is dead， CNN引述警方人士所言），於是警察開始亂咁嚟，雞手鴨腳咁樣企圖破門而入，刺激兇徒情緒，完全不顧人質安全而引起槍戰，導致八死七傷。整件事反映出菲律賓政府已失去管控社會秩序嘅能力，任何人到菲律賓做生意或旅遊，以後要考慮人身安全嘅後果！
（左丁山）2010年08月26日
No comments:
Post a Comment