捐身家

蓋茨與畢菲特倡議富豪捐身家，由捐出百分之五十講起，畢菲特就承諾捐出佢嘅身家嘅九成九，甲骨文（ Oracle）總裁 Larry Ellison，以前對捐身家一事，從來唔肯公開講，但最近居然公開聲明佢願意捐出九成五嘅家財，就好出乎意料之外，從中可見蓋茨與畢菲特兩位巨富嘅牙力。呢位埃利森先生最近致函《紐約時報》，痛斥惠普（ HP）將行政總裁 Mark Hurd炒魷，係大錯特錯，不顧股東、供應商及員工嘅利益，充份顯示佢係一位思想獨立，不易跟風嘅人物，但佢都肯簽 The Giving Pledge，令到呢個捐獻行動更增聲勢。

蓋茨與畢菲特預備在九月到中國，明年三月到印度，希望游說中印富豪加入，相信會有人肯制嘅，但捐晒身家或者捐一半，似乎與亞洲嘅傳子傳孫文化不合，而且美國嘅稅制與亞洲唔同，捐款誘因不一樣。譬如美國方面嘅入息稅（ income tax）計埋晒所有收入，包括股息、花紅、薪酬、贏馬彩金、獎金、利息等等，而稅率又有聯邦稅、州稅與地方若干稅項，於是乎啲富豪級人物加加埋埋，納稅隨時超過五成，至於遺產稅方面，於二○一○年十二月三十一號以後死亡嘅人士，遺產之頭三百萬元要抽一百二十九萬（即 43%），超過三百萬嘅要交 55%，超過一千萬美元嘅，再要交 5%附加稅，以畢菲特等等超級大富豪嘅身家嚟講，最起碼都有一百億美元，死後遺產稅可以高達六十億美元及以上。當然絕大部份富豪已有家庭信託之設，對遺產稅可避則避，但如果真係遺產交稅六成嘅話，生前先捐出五成，對富豪有何損失？答案就係冇乜，反而可以得到世人稱讚，對個人以至家族聲譽有利，況且在自己可以控制嘅情形之下送出家財予自己喜歡嘅項目（如蓋茨對愛滋病之關注），肯定好過將啲錢送咗畀美國聯邦政府亂咁花費。亞洲就唔同噃，捐款未必得到好大嘅稅務利益（例如香港係低稅地區，用慈善捐款嚟扣除稅務利益唔算高），而且好幾個地方（包括香港）已經廢除遺產稅添，有此關係，亞洲富豪肯捐身家嘅，少中又少，超級亞洲富豪如李嘉誠早已將三分一身家撥咗去慈善基金，亞洲罕見，香港還有一位田家炳先生幾乎捐盡家財嚟興辦教育，十分可敬。

（左丁山）2010年08月14日