我地香港人知咗好耐，現在連外國記者都留意到，中國富翁雖然使錢豪氣，豪爽，視一百萬元現金如浮雲，但佢地內心充滿不安全嘅感覺。前星期《 IHT》就有一篇北京報道，講中國富翁總係用盡方法，將部份財富轉移往外國，買個保險。中國古有明訓，狡兔有三窟，中國大部份富翁係在文革前後時期出生嘅（平均年齡 39歲），文革時得幾歲或未出世，未知父母受鬥爭之苦，成年後，發財後，點都會睇吓書，聽吓父母講故事，既有前車可鑑，將自己子女及部份現金送出境，實在係人之常情，最多領完外國護照，再回國大吃大喝，繼續發財。
《金融時報財富》專刊（ FT Wealth）嘅二○一○年夏季號有一段報道，引述二○一○年胡潤財富調查報告，指中國現有 875,000名百萬富翁，去年人數增加 6%，以此增長速度，到咗二○一二年，中國就會有一百萬名百萬富翁，呢班富翁以北京佔最多，共十五萬一千人，其次就係深圳，上海百萬富翁數目排第三。北京以官多、官大著名，估唔到連富翁數目都多過商業城市深圳、上海，北京人真係有辦法。
中國富翁轉移財富，最容易嘅方法就係先來香港一轉，之後再往美加澳洲，啲錢嚟香港，首選會係買樓，再加上倫敦趕客，有金融界重量級人馬想來香港做基地，齊齊催谷咗豪宅價格，好令雙曾頭痛。倫敦金融才俊為咗避開 50%稅率（按：年薪十五萬鎊以上就要交 50%稅），有乜好方法？上述《 FT Wealth》講，今年夏天有唔少高薪人士選擇「離休」（ sabbatical）一段時間，情願賺少啲錢，譬如賺到十四萬九千九百鎊就算嘞，但係要走得快噃，因為如果人同此心，心同此理，英國大公司會驚住冇人返工，可能取消「離休」呢項福利；除咗可以避稅之外，成日掛住返工搵銀，冷落老婆或老公嘅才俊，攞咗離休，與另一半渡假幾個月，仲可以挽救婚姻呢！但係如果早已搵銀二十萬鎊、五十萬鎊嘅才俊，放假都冇用，想唔交 50%稅，搬到星加坡或香港，先至可以逃離高稅網。保守黨自由民主黨聯合政府上台後，首相金馬倫為咗平衡財政赤字，實行加稅兼大幅度削減公共支出，實行「新革命」，打造《經濟學人》所謂 Radical Britain，在英國做高薪人士，唔怪得要搵路走。
（左丁山）2010年08月17日
No comments:
Post a Comment