經濟數據

聽基金 F唱好樓市，已經好耐，樓市又真係到目前為止，有升無跌，於是財政司司長與金管局再度出手禁止樓花摸貨及限制豪宅按揭成數，希望遏止炒風，能否見效，唔敢講，不過上星期聽手持幾間豪宅嘅財務 R講，炒豪宅摸貨嘅交易成本（佣金加印花稅）幾高吓，係一個高難度動作，一個月前有經紀叫佢摸貨圖利，佢都唔敢沾手。

基金 F唱好樓市，中到正。天真許就唱淡股市，七月下旬就來電話股市就快跌，七月廿七日見頂。左丁山放假回來，見到股市日日升，於是打電話畀天真許：「喂，你認唔認錯呀？」天真許哼一聲：「繼續看淡，就快跌 o架嘞。」過多幾日，八月十日就開始跌，由高處回落，於是問天真許：「獲利回吐呀嘛，幾時反彈？」天真許答：「睇我網站評論就知，道指恒指繼續下滑，暫時未見底！」（ www.aimykhui.com.hk）。

天真許話美國失業人數太多，有四千萬人攞 food stamp，國家赤字太大，外強中乾格局，難以長期看好。要睇數據就有好多嘞，左丁山買過好幾本美國經濟數據書籍，已經過時，最近去曼谷一行，例牌到四季酒店隔壁 Peninsula Plaza內嘅 Asia Books逛逛，呢間係泰國有三十幾年歷史嘅純英文書店，內有不少經濟書籍係香港書店唔會入貨嘅。今次買咗一本《 The Secrets of Economic Indicators》（作者 Bernard Baumohl， 2009年二月第二版第九次印刷），呢位先生以前係《時代雜誌》經濟記者，攞過「最佳財經新聞報導獎」。

呢本書以輕鬆新聞報導手法嚟講述每星期美國各部門（如勞工部、商務部、聯儲局）公佈嘅經濟數據，分析邊個數據對市場最有影響力，最後兩章，第五章及第六章提供美國及國際經濟數據嘅「最佳網址」（ best websites），等讀者可以自行上網搜尋；做財經記者、編輯、評論員，揸住呢本書，確實覺得好有參考作用。目前中國嘅經濟數據，對世界市場亦有頗大影響，但最近宣佈之前（例如 CPI）一日，傳媒已經知道晒，準到飛起，令人懷疑有冇人洩漏造市，睇吓上述本書，就知道美國對宣佈數據前之保密工夫做到十足十，值得北京國家統計局學習學習。

（左丁山）2010年08月18日