謝曉瑩 26歲
拜師：梁素琴
以前粵劇演員細細個開始訓練，學歷唔高兼用師徒制。新一代粵劇演員就幸運得多，可以學業練功兩邊顧，擁有大學學歷者比比皆是，年紀輕輕已可上位做花旦武生。今日訪問的 80後花旦謝曉瑩和武生黎耀威，親身解說粵劇絕不是夕陽行業。
記者：林佩婷
攝影：林栢鈞部份相片由受訪者提供
港大生從小執迷
26歲的謝曉瑩 05年畢業於香港大學文學院中文系， 09年完成香港大學中文學院哲學碩士，研究戲曲劇本文學。她說讀書成績好的最大推動力就是為了學粵劇，「 4歲時跟阿媽去看粵劇，被演員的服飾、妝扮、頭飾深深吸引，媽咪去學唱曲就像小跟班跟到實，在旁邊跟住唱， 10多歲已經開始上粵曲班。當時阿媽唔係咁鍾意我學，開出條件話成績好先有得學，所以我拚命讀書。最記得我好遲先練功，就係因為媽咪話會考後先學得；點知會考完第二日見媽咪無反應以為佢反口，係咁喊，媽咪怕咗我就即刻帶我上八和鑾輿堂報名。」自此以後她不斷跟香港和內地的老師學習，更拜師名旦梁素琴，學約兩年後正式表演。她說多得 Auntie們的提攜，只做了一次二幫花旦，之後接的都是正主位置，「記得第一套《人鬼神》做二幫花旦，中七之後有 Auntie出資同大陸合作搵我做正主，仲記得擔正嗰套係《活捉張三郎》，嗰陣勁開心但一啲都唔緊張，之後接嘅戲都係做主角。」
新派粵劇着西服
可惜謝媽媽始終認為戲行複雜是非多，不讓曉瑩全身投入。碰上當時 TVB開了套高清拍攝的粵劇節目，她大學剛畢業就入去做編採，一做三年。「拍了三年《合晒合尺》，編輯、剪接、配音等一腳踢，令自己少咗好多機會演出，但最開心是訪問到很多老前輩，令我同粵劇人接觸更緊密。」 07年曾嘗試學做生意滿足謝媽媽寄望，可是最終覺得粵劇之路最啱自己，「 09年簽咗唱片公司。同年仲自己籌備粵劇棟篤笑， Sell畀高志森又採納咗，於是搵尹光合作講述新馬仔。」
好多人以為粵劇劇本一定取材古代故事，但其實現時劇本和服裝等都有很多創新，既有採自莎士比亞的故事做劇目如《英雄叛國》，最新更有羅家英寫的《德齡與慈禧》。混合多種語言和戲服設計，曉瑩不但在裏面飾演德齡一角，還有份撰寫其中小部份，「家英哥寫呢個劇本嗰陣，有日話我都係讀中文出身，不如試吓寫劇本，於是叫我寫部份場次。佢太太阿姐之前同我喺《合晒合尺》合作過，就搵我做德齡。其實呢個劇好睇到粵劇轉變，題材新穎咗，當中有唱曲、英文、意大利文。至於服飾，你有無諗到着西服上台唱曲？呢啲都可以話係進步。」
1.曉瑩身兼文武花旦，幾年前《白蛇傳》飾白素貞，動作連連。
2.首次擔正主角的《活捉張三郎》，和廣州紅豆粵劇團丑生張雄平先生合作，她說開心多過緊張。
3.《德齡與慈禧》不但唱曲，還要講英文、意大利文，更有外國人登場，可謂粵劇一大突破。
4.《攔馬》扮楊八妹，女扮男裝武打場面應付自如，屬年輕一輩中少有的紮實功架。
5.謝曉瑩說最希望政府能籌辦一所粵劇學校，令粵劇文化更普及。
6.09年出了兩本書，記錄自己寫的劇評和生活點滴：《曉心瑩目》$68、《向上爬．向下爬》$48。
7.當年未有 CD或 VCD，前輩演出和自己獻唱，統統用錄音帶錄下來，變成珍藏。
8.18歲拜梁素琴為師，師傅更送條鏈給她作紀念。
9.就讀嘉諾撒聖瑪利書院時，每逢有大場面，學校總要她出席表演。
10.加入八和會館，曾和陳寶珠相遇。
11.01年獲香港學校粵曲歌唱比賽公開獨唱組冠軍，由梁漢威頒獎。
12.02年第一次演神功戲《六國大封相》跳羅傘架。
13.自編自演的粵曲棟篤笑，造型多變。
14.她眼中的家英哥博學多才，搞笑正經皆宜，看人挑通眼眉。
15.每當《德齡與慈禧》開記招，阿姐都會帶埋班女演員一齊去化妝，盡顯可愛一面。
因緣際會變全職
■阿威話最想挑戰由莎士比亞改編的《英雄叛國》。
25歲的黎耀威和曉瑩學習粵曲的原因差不多，都是細個跟家人在布袋澳看神功戲而入迷。他 6歲時去成人粵曲班跟叔叔姨姨齊齊學，到五年級去屯門文協練功走圓枱，當時雖辛苦，但有得做戲都好開心。「練功由中午練到六點，不停重複又重複，不過相比內地我哋就輕鬆好多。最開心係排戲，即使老師編你企埋兩邊，都會好 Enjoy。」中五時已接觸戲班行內人，他開始當兼職由下欄（低層演員）做起。中六曾在家人勸告下進入迷茫期，幫他決定的竟然是社會經濟環境。「我媽想我做醫生，我爸想我做騎師。嗰陣咁啱經濟唔好，我又考到大學，咪決定 Part Time做戲做到畢業至算。 01年吳仟峰太太搞新折子戲，剛好媽咪朋友叫佢搵我做，點知吳太連見都無見過我就話好。第一次做就喺新光戲院做《白兔會》，仲同仔哥（吳仟峰）合作。做完之後佢叫我落戲班，咁就正式開始職業生涯。最記得第一台跟職業班表演做下欄係返布袋澳，嗰刻感覺真係好奇妙。」
傳統框框搞新題材
黎耀威 25歲
拜師：文千歲
大學畢業後變全職粵劇演員， 01-04年做下欄，邊度要人就去邊度， 05年升為二步針（二線演員）， 07年便向台柱出發，現時主力做武生、小生，他說自己晉升過程都算幸運。「以前咁多人做，競爭大自然難升正，咦家入行人少咗，自然快啲上位，不過當然都要有實力同市場需要你先有得做，我覺得最重要係有人認同。就算我做緊戲，依然向華哥（文千歲）拜師學藝，最記得拜師嗰刻佢送咗支降魔棒畀我，叫我要行正義嘅路，唔好同流合污。」
談到粵劇在香港始終屬非主流娛樂，怕不怕日後失傳？他說做藝術的人有責任延續，「粵劇雖然傳統但唔古老，好似逢新年一定要做，自有其地位。其實最大問題係要做咩嘢先可以留住觀眾？以前六、七十年代舞台設計好發達，演員真係可以噴火又或打到飛落台，咦家呢啲反而無晒。個人覺得要切合市場需要，唔可以故步自封。好似演出時間係咪一定要咁長？題材老唔老土？若有吸引故事題材，再配合服裝，造成視覺、聽覺刺激，加上宣傳，未必無得做。咦家多講愛情、生死可能較單調，我希望可以喺傳統框框內試新題材，令觀眾睇完後有所體會，造成一股劇場文化。做年輕人就係要冒險，自己都有諗將來組劇團，希望喺創作上做到大膽而不越軌。」
16.最近演《六國大封相》公孫顯，身上的黃色蟒衫是師傅文千歲所送。
17.初出道即和吳仟峰合作，還被邀埋班，可算是帶他入行的前輩。
18.自細開始儲粵劇單張，最耐嗰張可追溯至 93年，當時他只有 9歲。
19.第一次和師傅文千歲演對手戲驚到震，幸好做完師傅無反應，即代表無事。
20.塔門十年才做一次搭棚大戲，難得回自己鄉下演出，鄉親勁送 15個花牌，他感覺衣錦榮歸，更慶幸與前輩阮兆輝和蓋鳴暉合作演出。
No comments:
Post a Comment